पती-पत्नीला धमकावत साडेनऊ तोळे दागिन्यांची चोरी

चाकण, ता. १५: वाकी बुद्रुक (ता. खेड) येथील गारगोटे शिवारातील काळूस रोडवर असलेल्या एका घरात रात्री दोनच्या सुमारास सुरेश टोपे व त्यांची पत्नी हे दोघे झोपेत होते. त्यावेळी त्यांच्या घराच्या पाठीमागील बाजूच्या दरवाजाचे कुलूप व आतमधील लाकडी दरवाजा तोडला व चार जणांनी घरात प्रवेश केला व पती, पत्नीला धमकावून झोपेतून उठवले घरातील साडेनऊ तोळे सोन्याचे दागिने व रोख रक्कम असा सुमारे तीन लाख ८५ हजार रुपयांचा माल चोरून नेला. याप्रकरणी चार चोरट्यावर गुन्हा दाखल केला आहे.

चाकण पोलिस ठाण्याचे वरिष्ठ पोलिस निरीक्षक प्रमोद वाघ यांनी दिलेल्या माहितीनुसार, ही घटना शुक्रवारी ( ता.१३) रात्री दोनच्या सुमारास घडला. आरोपी चोरट्यांच्या हातामध्ये लोखंडी कोयते व लोखंडी विळे होते ते सर्वजण चांगल्या प्रकारे मराठी भाषा बोलत होते. त्यांचे वय अंदाजे २५ ते ३५, ४० वर्षाचे होते. उंची साडेपाच ते सहा फूट व सडपातळ बांध्याचा होता. तुला व तुझ्या पत्नीला आम्ही जिवे मारून टाकू. त्यावर सुरेश यांच्या पत्नीने तिच्याकडे असणारे सर्व सोन्याचे दागिने काढून चोरट्यांना दिले व सुरेश टोपे यांनी देखील त्यांच्या गळ्यातील सोन्याची साखळी काढून दिली. त्यानंतर चोरटे दोघांचे मोबाईल घेऊन बेडरूमला बाहेरून कडी लावून निघून गेले. त्यानंतर सुरेश टोपे व त्यांची पत्नी दोघे रात्रभर बेडरूम मध्येच बसले होते. दरम्यान, चोरीप्रकरणी सुरेश टोपे यांनी पोलिसात फिर्याद दिली आहे.