चाकणची कोंडी सोडवण्यासाठी मुख्यमंत्र्यांना साकडे

चाकण, ता. ८ : येथील पुणे- नाशिक महामार्ग चाकण- तळेगाव, चाकण- शिक्रापूर मार्गावर सातत्याने वाहतूक कोंडी होत आहे. या वाहतूक कोंडीमुळे नागरिक, कामगार, व्यापारी, व्यावसायिक, उद्योजक, विद्यार्थी सारेच हैराण झाले आहेत. त्यामुळे येथील वाहतूक सुरळीत करावी. नवीन मार्गाची कामे करावीत, तसेच याबाबत योग्य कार्यवाही करावी, यासाठी मुख्यमंत्री देवेंद्र फडणवीस यांना ईमेल वर विनंती अर्ज पाठवण्यात आले. यावर मुख्यमंत्री कार्यालयाने संबंधित विभागाला वाहतूक कोंडी सोडविण्यासाठी योग्य ते कार्यवाही करण्याचे आदेश दिले आहेत.
चाकण (ता. खेड) येथील मोठ्या औद्योगिक वसाहतीमुळे, तसेच मोठ्या रहदारीमुळे कंपन्यांतील अवजड वाहनांच्या वाहतुकीमुळे वाहतूक कोंडी सातत्याने होत आहे. अगदी मुख्यमार्गावर पाच, दहा किलोमीटर ही वाहनांच्या रांगा लागत आहेत. पुणे- नाशिक मार्गाचे काम मंजूर झाले आहे. चाकण- तळेगाव, चाकण- शिक्रापूर मार्गाचे काम मंजूर झाले आहे. निविदाही निघतात, परंतु प्रत्यक्षात काम कधी सुरू होणार, याची उत्कंठा आहे.
दरम्यान, चाकणची वाहतूक कोंडी सोडविण्यासाठी मुख्यमंत्र्यांनी लक्ष घालावे, योग्य ती कार्यवाही करावी, याबाबत सामाजिक कार्यकर्ते स्वप्नील गोरे यांनी मुख्यमंत्र्यांना इ मेल करून वाहतूक कोंडीची समस्या मांडली होती. याबाबत मुख्यमंत्र्यांनी लक्ष घालून योग्य ती कार्यवाही करण्याचे आदेश दिले आहेत.
दरम्यान, चाकणची वाहतूक कोंडी सोडविण्यासाठी, तसेच नवीन मार्ग होण्यासाठी ‘सकाळ’ने वेळोवेळी पाठपुरावा चालवला आहे. पाठपुरावा कौतुकास्पद आहे, असे सामाजिक कार्यकर्ते रामदास जाधव, स्वप्नील गोरे, चाकण शहर काँग्रेस अध्यक्ष बाळासाहेब गायकवाड, शिवसेनेचे (शिंदे) उपजिल्हा प्रमुख प्रकाश वाडेकर, डॉ.अमोल बेनके, उद्योजक भरत कानपिळे, डॉ. भरत राऊत, डॉ. राहुल राजे यांनी सांगितले.

शक्तिपीठ मार्गापेक्षा चाकणचे मार्ग महत्त्वाचे
देशातील महत्त्वाची औद्योगिक वसाहत चाकण आहे. देशातून कामगार वर्ग येथे आलेला आहे. पुणे नाशिक महामार्ग ,चाकण शिक्रापूर, चाकण तळेगाव मार्गावर मोठ्या प्रमाणात अवजड वाहनांची येजा आहे. त्यामुळे राज्यात शक्तीपीठापेक्षा हा मार्ग महत्त्वाचा आहे शक्तिपीठ मार्गाला शेतकऱ्यांचा विरोध आहे. परंतु येथे कोणाचा विरोध नाही. हा मार्ग लवकर करावा अशी वारंवार मागणी आहे. याकडे मुख्यमंत्री साहेबांनी लक्ष द्यावे, असे चाकण शहर काँग्रेस अध्यक्ष बाळासाहेब गायकवाड यांनी सांगितले.