चाकणला मालमत्ता कराच्या शास्तीला अभय योजना

चाकण, ता. १५ : शासनाच्या नगरविकास विभागाच्या निर्णयानुसार चाकण नगरपरिषद हद्दीतील थकीत मिळकत धारकांची मालमत्ता करावरील शास्ती (दंड) अंशतः माफ करण्यासाठी अभय योजना प्रोत्साहनात्मक राबविण्याचा निर्णय नगरपरिषदेने घेतला आहे. योजनेमध्ये १९ मे २०२५ पर्यंत ज्या मिळकतधारकांची शास्ती थकबाकी आहे त्यांना नगरपरिषदा, नगरपंचायती, औद्योगिक नगरी अधिनियम, १९६५ चे कलम १५० अ (१) नुसार नगरपरिषद मालमत्ता करावरील शास्ती अंशतः माफ करण्यासाठी अटी आणि शर्थीच्या अधीन राहून येत्या १० ऑगस्टपर्यंत विहित नमुन्यात अर्ज मागविण्यात येत आहेत. अर्जाचा नमुना कर विभाग आणि चाकण नगरपरिषदेच्या संकेतस्थळावर उपलब्ध करून देण्यात आला आहे.
चाकण नगरपरिषदेकडील आर्थिक वर्ष २०२५-२६ चे मालमत्ता करांची बिले वाटप सध्या सुरु आहेत. अभय योजनेचा लाभ घेण्यासाठी थकीत मिळकतकर धारकांनी २०२५-२६ पर्यंतचा ५० टक्के शास्ती वगळता इतर मालमत्ता कराची संपूर्ण रक्कम भरलेली असावी. अभय योजने व्यतिरिक्त मालमत्ता कर बिल प्राप्त झाल्यानंतर १५ दिवसांच्या आत कराचा भरणा केल्यास बिलामधील मालमत्ता कराच्या एक टक्का सूट लागू आहे. त्यामुळे अभय योजना आणि मालमत्ता सवलतीचा लाभ घेण्यासाठी लवकर कराचा भरणा करावा असे जाहीर आवाहन चाकण नगरपरिषदेचे मुख्याधिकारी डॉ. अंकुश जाधव यांनी मिळकतधारकांना केले आहे.