चाकण- आळंदी मार्गावर मोटारीची रानडुकराला धडक

चाकण, ता. १९ : येथील चाकण- आळंदी मार्गावर शनिवारी (ता. १९) पहाटे सहाच्या सुमारास एका मोटारीने रस्ता ओलांडणाऱ्या रानडुकराला जोराची धडक दिली. या धडकेत रानडुकराचा जागीच मृत्यू झाला.
याबाबत वनविभागाच्या वतीने पंचनामा करण्यात आला असून, रानडुकराचे शवविच्छेदन करून त्याची विल्हेवाट लावण्यात येणार असल्याचे चाकण वनविभागाचे अधिकारी संतोष कंक यांनी सांगितले. चाकण- आळंदी मार्गावर चाकण वन विभागाच्या हद्दीत रोटाई तळ्याजवळील मार्गावर मार्गावरून जाणाऱ्या एका मोटारीची रानडुकराला धडक बसली. या धडकेत कारचे नुकसान झाले. तसेच, रानडुकराचा जागीच मृत्यू झाला. वन विभागाला ही माहिती मिळाल्यानंतर वनविभागाच्या अधिकाऱ्यांनी त्या घटनेचा पंचनामा केला. तसेच, कारचालकाचाही जबाब नोंदविला आहे.
चाकण - आळंदी मार्गावरून औद्योगिक वसाहतीमुळे मोठ्या प्रमाणात सध्या अवजड वाहने, तसेच इतर वाहनांची वाहतूक वाढली आहे. वाहन चालकांनी वाहने चालविताना रस्त्यावरून सातत्याने ये- जा करणारे वन्यप्राणी लक्षात घेऊन वाहने कमी वेगाने चालवावीत. त्यामुळे वन्यजीवांना धोका पोहोचणार नाही, असे आवाहन चाकण वनविभागाचे अधिकारी संतोष कंक यांनी केले आहे.