तळेगाव चौकात होणार ‘स्कायवॉक’

चाकण, ता. १९ : येथील पुणे-नाशिक महामार्गावर तळेगाव चौकात राष्ट्रीय राजमार्ग प्राधिकरण (एनएचएआय) यांच्यावतीने लोखंडी ‘स्कायवॉक’ होणार आहे. ‘स्कायवॉक’मुळे पादचाऱ्यांना मार्ग ओलांडणे सोपे आणि सुरक्षित होणार आहे. हा ‘स्कायवॉक’ काही महिन्यात मार्गी लागणार असल्याचे राष्ट्रीय राजमार्ग प्राधिकरणाचे उपअभियंता दिलीप शिंदे यांनी सांगितले.
पुणे-नाशिक महामार्गावर तळेगाव चौकात पादचाऱ्यांना मार्ग ओलांडताना कसरत करावी लागते. काही वेळा जीव धोक्यातही जातो. मार्ग ओलांडताना अनेक पादचाऱ्यांचे अपघात झालेले आहेत. मार्गावर ‘स्कायवॉक’ व्हावा अशी मागणी अनेक वर्षांपासून आहे. याबाबत ‘सकाळ’ने तळेगाव चौकात ‘स्कायवॉक’ व्हावा असे वृत्त प्रसिद्ध केले होते. तळेगाव चौकात ‘स्कायवॉक’ झाल्यास त्यावरून पादचारी मार्ग ओलांडतील. त्यामुळे ‘स्कायवॉक’ महत्त्वाचा असल्याचे अधिकारी, पोलिसांनी सांगितले.
पुणे-नाशिक महामार्गावर तळेगाव चौक, आंबेठाण चौकात मार्ग ओलांडणाऱ्या पादचाऱ्यांची संख्या मोठी आहे. तसेच माणिक चौकातही पादचाऱ्यांची संख्या अधिक आहे. त्यामुळे आंबेठाण चौक, माणिक चौकातही स्काय वॉक होणे गरजेचे असल्याचे अनेकांचे म्हणणे आहे.
याबाबत एनएचएआयचे उपअभियंता दिलीप शिंदे म्हणाले, ‘‘पुणे-नाशिक महामार्गावर तळेगाव चौकात ‘स्कायवॉक’ सुमारे ४५ मीटर रुंदीचा तसेच सहा मीटर उंचीचा आहे. लवकरच या ‘स्कायवॉक’चे काम करण्यात येणार आहे. पादचऱ्यांना मार्ग ओलांडताना सुरक्षितता मिळणार आहे. सध्या तरी तळेगाव चौकात होणार आहे.’’