चाकणला अनधिकृत रिक्षांवर कारवाई

चाकण, ता. ३० : चाकण (ता. खेड) येथील अनधिकृत रिक्षांवर प्रादेशिक परिवहन विभागाच्या पाच ते सहा पथकाच्या वतीने कारवाई करण्यात आली. यावेळी ३० रिक्षांवर कारवाई करण्यात आली आहे. अजूनही कारवाई करण्यासाठी दोन पथके नेमण्यात आली आहेत. स्थानिक वाहतूक विभागाच्या पोलिसांनी कारवाई करणे गरजेचे आहे, असे पिंपरी चिंचवडचे प्रादेशिक परिवहन अधिकारी संदेश चव्हाण यांनी ‘सकाळ’ शी बोलताना सांगितले.
पुणे- नाशिक महामार्ग, चाकण- तळेगाव, चाकण- शिक्रापूर, चाकण- आंबेठाण मार्गावर मोठ्या प्रमाणात रिक्षा धावतात. काही रिक्षांना परवाने आहेत, तर काही रिक्षा बेकायदा धावतात. त्या रस्त्यावर अस्ताव्यस्त थांबत असल्यामुळे मोठ्या प्रमाणात वाहतूक कोंडी होते. या रिक्षा वाहतूक कोंडी करण्यास कारणीभूत आहेत म्हणून त्या रिक्षा बंद कराव्यात, या मार्गावर अधिक पीएमपीएमएल बससेवा सुरू करावी, अशी मागणी सामाजिक कार्यकर्ते राहुल गोरे व इतरांची आहे.
चाकण परिसरात दररोज पाच हजारांवर रिक्षा धावत आहेत. काही रिक्षांना परवाने आहेत, तर बहुतांश रिक्षा बेकायदा इतर जिल्ह्यातील आहेत. इतर जिल्ह्यातील काही गुन्हेगार प्रवृत्तीचे तरुण या रिक्षा चालवतात. रिक्षा तळेगाव, आंबेठाण, माणिक चौकात अस्ताव्यस्तपणे लावल्या जातात. त्यामुळे वाहनांना अडथळा होतो व वाहतूक कोंडी होते. या रिक्षांवर स्थानिक पोलिस वाहतूक विभागाने तसेच प्रादेशिक परिवहन विभागाने कारवाई करण्याची मागणी वाहनचालक व स्थानिक नागरिक करीत आहे.

हप्त्यांवर चालतात रिक्षा
काही रिक्षांना पुणे जिल्ह्याचा परवाना नाही, त्याही रिक्षा येथे धावतात. या रिक्षांचे मालक वेगळे व चालविणारे वेगळे असतात. या रिक्षा हप्त्यांवर चालतात. या रिक्षात कायदेशीर प्रवासी क्षमतेपेक्षा अधिक प्रवासी भरले जातात. त्यामुळे अपघात होतात व अनेकांचे जीव जात आहेत.

चाकण (ता. खेड) : पुणे- नाशिक महामार्गावर तळेगाव चौकात प्रवासी भरण्यासाठी थांबलेल्या रिक्षा.