औद्योगिक वसाहतीत अवजड वाहनांना बंदी

चाकण, ता. २ : येथील औद्योगिक वसाहतीचा काही भाग तसेच तळेगाव, चाकण, शिक्रापूर या मार्गावर सकाळी आठ ते दुपारी बारा तसेच सायंकाळी चार ते रात्री नऊ या वेळेत अवजड वाहनांना रविवार (ता. ३) पासून या मार्गावर ये-जा करण्यास बंदी घालण्यात आली आहे, अशी माहिती पिंपरी चिंचवडचे वाहतूक शाखेचे पोलिस उपआयुक्त विवेक पाटील यांनी दिली.
चाकण (ता. खेड) येथील औद्योगिक वसाहतीतील अंतर्गत रस्ते व चाकण-तळेगाव, चाकण-शिक्रापूर या मार्गावर कंटेनर, ट्रेलरसारख्या अवजड वाहनांची वाहतूक मोठ्या प्रमाणात सुरू असते. त्यामुळे इतर वाहतुकीला अडथळा निर्माण होतो, तर कधी कधी वाहतूक कोंडीची समस्‍या उद्‍भवते. त्यामुळे वाहतूक सुरळीत करण्यासाठी सकाळी आठ ते दुपारी बारा तसेच सायंकाळी चार ते रात्री नऊ या वेळ या मार्गावर अवजड वाहनांना बंदी घालण्यात आली आहे. त्यामुळे इतर वाहने तसेच कामगार व नागरिकांचा प्रवास अधिक सुरक्षित होणार आहे.
औद्योगिक वसाहतीतील हुंडाई सर्कल ते खालुंब्रे या मार्गावर अवजड वाहनांना बंदी राहील. तसेच तळेगाव-चाकण, चाकण-शिक्रापूर मार्गावरही (अत्यावश्यक सेवेची वाहने वगळून) हा निमय लागू होणार आहे, असे पोलिस उपआयुक्त यांनी काढलेल्या आदेशात म्हटले आहे.

या कालावधीत जड, अवजड वाहने या मार्गांवर ये-जा करताना आढळली, तर त्यांच्यावर सक्त कारवाई करण्यात येणार आहे. तसे आदेश संबंधित वाहतूक शाखांना दिले आहे
- विवेक पाटील, पोलिस उपआयुक्त, वाहतूक शाखा पिंपरी-चिंचवड.