चाकणला बटाट्याची १४०० क्विंटल आवक

चाकण, ता. ३ : येथील खेड कृषी उत्पन्न बाजार समितीच्या महात्मा फुले बाजार आवारात रविवारी (ता. ३) आग्रा, गुजराती, इंदोर बटाट्याची सुमारे १४०० क्विंटल आवक झाली. टोमॅटोची जिल्ह्यातून तसेच, नगर, नाशिक जिल्ह्यातून सुमारे ५५ टन आवक झाली. पावसाच्या उघडिपीनंतर टोमॅटोची मागणी वाढली असली तरी किरकोळ बाजारात मात्र ४० ते ५० रुपये प्रति किलोने विकले जात आहे. घाऊक बाजारात मात्र ३० ते ४० रुपये भाव मिळत आहे.
चाकण (ता. खेड) येथील बाजारात १००० क्विंटल कांद्याची आवक झाली. कांद्याला प्रति किलो किमान १० ते कमाल १७ रुपये भाव मिळाला. कांद्याचे भाव प्रतिकिलोला घाऊक बाजारात आठ ते १० रुपयांनी घसरले आहेत. बटाट्याला प्रतवारीनुसार तसेच दर्जा नुसार किमान १५ ते १८ रुपये भाव मिळाला. इंदोर बटाट्याला प्रति किलो १९ रुपये भाव मिळाला. इंदोर बटाट्याला मोठी मागणी राहिली. आग्रा, गुजराती बटाटा किरकोळ बाजारात २५ रुपये प्रति किलोने विकला जात होता, अशी माहिती खेड कृषी उत्पन्न बाजार समितीचे सभापती विजय शिंदे, उपसभापती क्रांती सोमवंशी, सचिव बाळासाहेब धंद्रे यांनी दिली.

हिरव्या मिरचीची दिल्लीतून, तसेच राज्यातील बुलडाणा व इतर भागातून सुमारे ५० टन आवक झाली. हिरव्या मिरचीला प्रति किलो किमान ४० ते कमाल ५० रुपये भाव मिळाला. किरकोळ बाजारात हिरवी मिरची १०० रुपये प्रति किलोने विकली जात आहे.

फळभाज्यांचे भाव पुढील प्रमाणे (प्रति किलोचे भाव रुपयांमध्ये) ः
टोमॅटो (३० ते ४०), कारली (२० ते ३०), दोडका (३० ते ४०), भेंडी (३० ते ४० रुपये), गवार (६५ ते ८५), कोबी (१२ ते १४), फ्लॉवर (१० ते १५), वांगी (२० ते ३०), काकडी (१० ते १५), वालवर (५० ते ७०), हिरवी मिरची (६० ते ७०), दुधी भोपळा (१५ ते २५), शेवगा (३० ते ४०), ढोबळी मिरची (२० ते ३०), चवळी (२५ ते ३५), हिरवा वाटाणा (१२०), गाजर (१५ ते २०), आले (२० ते ३०).

कोथिंबीर, मेथीच्या एक लाखांवर जुड्यांची आवक
कोथिंबीर, मेथीच्या सुमारे एक लाखांवर जुड्यांची आवक झाली. कोथिंबिरीच्या एका जुडीला तीन ते सहा रुपये भाव मिळाला. मेथीच्या एका जुडीला पाच ते दहा रुपये भाव मिळाला. शेपूच्या एका जुडीला तीन ते चार रुपये भाव मिळाला तर पालकाच्या एका जुडीला सात ते आठ रुपये भाव मिळाला

08979