आमदाराचा पुतण्या चौकशीच्या फेऱ्यात

चाकण, ता. ४ : येथे चाकण- शिक्रापूर मार्गावर माणिक चौकात, ‘मी आमदाराचा पुतण्या आहे’ असे म्हणत ‘नो एन्ट्री’मधून जाण्याचा हट्ट धरून पोलिस अधिकारी व कर्मचाऱ्यांशी हुज्जत घालून शिवीगाळ व दमदाटी केल्याप्रकरणी मयूर काळे याच्यावर पोलिसांनी रविवारी (ता. ४) गुन्हा दाखल केला होता. याबाबत मयूर काळे याची चौकशी होणार आहे, अशी माहिती चाकण पोलिस ठाण्याचे वरिष्ठ पोलिस निरीक्षक संजय सोळंके यांनी दिली.
याबाबत वरिष्ठ पोलिस निरीक्षक सोळंके यांनी सांगितले की, या गुन्ह्यात कायद्यानुसार अटक करता येत नाही. गुन्हा दाखल झाल्यानंतर मयूर काळे याला पोलिसांच्या वतीने नोटीस पाठवण्यात येणार आहे. चौकशीसाठी बोलविण्यात येणार आहे जाबजबाब घेण्यात येणार आहेत. त्यानंतर दोन महिन्याच्या आत न्यायालयात दोषारोपपत्र सादर केले जाणार आहे.
दरम्यान, या प्रकारानंतर वरिष्ठ पोलिस अधिकारी नेमकी काय भूमिका घेतात, याकडे तालुक्याचे लक्ष लागले आहे.