चाकण बाह्यवळणासाठी भूसंपादनाबाबत नोटीस

चाकण, ता. ७ : येथील पुणे- नाशिक महामार्ग, चाकण- तळेगाव, चाकण- शिक्रापूर मार्गावरील वाहतूक कोंडी सोडविण्यासाठी पुणे महानगर प्रदेश विकास प्राधिकरणाच्या (पीएमआरडीए) वतीने कडाचीवाडी, रासे फाटा ते मेदनकरवाडी, नाणेकरवाडी ते खराबवाडी औद्योगिक वसाहत बाह्यवळण मार्ग ३६ मीटर रुंदीचा रस्ता करण्यासाठी खासगी मालमत्ता, भूसंपादनाची प्रक्रिया राबविण्यासाठी खेडचे प्रांताधिकारी अनिल दौंडे यांच्या वतीने जाहीर नोटीस प्रसिद्ध केली आहे. या बाह्यवळण मार्गासाठी ‘सकाळ’ने वेळोवेळी बातम्या देऊन, तसेच अधिकाऱ्यांकडे पाठपुरावा करून प्रयत्न केला आहे.
चाकण (ता. खेड) येथील हा पर्यायी बाह्यवळण मार्ग कडाचीवाडी रासे फाटा ते मेदनकरवाडी, नाणेकरवाडी- खराबवाडी असा आहे. कडाचीवाडी- रासे फाटा ते मेदनकरवाडी हा सुमारे अडीच किलोमीटरचा बाह्यवळण रस्ता आहे. या प्रकल्पासाठी जमिनी थेट खरेदी पद्धतीने संपादन करण्यात येणार आहे. हा मोबदला निश्चित करण्यासाठी गठित केलेल्या जिल्हास्तरीय समितीमार्फत नवीन भूसंपादन अधिनियम २०१३ मधील कलम २६ ते ३०नुसार संबंधित जमिनीसाठी बाजारमूल्य दर व एकूण मोबदला निश्चित करण्यात येणार आहे. एकूण मोबदला रकमेवर थेट खरेदी समिती अनुदान म्हणून अतिरिक्त २५ टक्के मोबदला निश्चित करण्यात येणार आहे. या संपादनासाठी काही हरकती असल्यास या जमिनीमध्ये अधिकार, कोणाचे कायदेशीर हितसंबंध असल्यास त्यांनी कायदेशीर पुराव्यासह नोटीस प्रसिद्ध झाल्यापासून पंधरा दिवसाच्या आत खेडचे उपविभागीय अधिकारी राजगुरुनगर यांच्या कार्यालयात हरकती दाखल करावयाच्या आहेत.
चाकणची वाहतूक कोंडी सोडवण्यासाठी जिल्हाधिकारी जितेंद्र डूडी, तसेच पीएमआरडीएचे आयुक्त योगेश म्हसे यांनी गतीने भूसंपादनाची प्रक्रिया सुरू केलेली आहे. येत्या काही महिन्यात भूसंपादनाची प्रक्रिया पूर्ण होईल. त्यानंतर कडाचीवाडी- रासे फाटा ते मेदनकरवाडी पुणे- नाशिक महामार्ग, तसेच नाणेकरवाडी ते खराबवाडी औद्योगिक वसाहत या सुमारे साडेचार किलोमीटर रस्त्याचे काम पूर्ण होईल. वाहतूक कोंडी सुटण्यासाठी चालना मिळेल.
या मार्गाचे काम तातडीने हाती घ्यावे, अशी मागणी मेदनकरवाडीचे सरपंच अमोल साळवे, उपसरपंच महेंद्र मेदनकर, ॲड. संकेत मेदनकर, संभाजी मेदनकर, अमित मेदनकर, गणेश भुजबळ, हेमंत भुजबळ व इतरांनी केली आहे.

२०१ शेतकऱ्यांचे भूसंपादन
मेदनकरवाडीतील ९३ शेतकऱ्यांच्या जमिनी संपादित करण्यात येणार आहेत. कडाचीवाडीतील ४४ शेतकऱ्यांच्या जमिनी संपादित करण्यात येणार आहे. नाणेकरवाडी ते खराबवाडी औद्योगिक वसाहतीतील अंतर्गत रस्त्यासाठी नाणेकरवाडीतील ६४ शेतकऱ्यांचे भूसंपादन होणार आहे.