घराघरांत दुःखाचा महापूर

चाकण : अपघाताची बातमी वाऱ्यासारखी पसरली आणि गावातील तरुणांची, नागरिकांची धाव पाईटच्या कुंडेश्वर रस्त्याकडे गेली. ज्यांच्या कुटुंबातील महिला होत्या, त्यांचे नातेवाईक अपघात स्थळी गेले. आपलं कोण जखमी आहे? काय झालंय? याची परिस्थिती जो तो जाणून घेत होता. ज्या रुग्णालयात जखमी आहे, तिथे त्यांचे नातेवाईक कुटुंबातील व्यक्ती जात होते, तिथे त्यांनी गर्दी केली होती. पापळवाडी, पाईट गाव मात्र या दुर्दैवी घटनेने निःशब्द झाले होते. छोट्याशा साडेतीनशेच्या लोकसंख्येच्या पापळवाडीमध्ये घराघरात दुःखाचा महापूर दाटून आला होता. दुपारपासून हसणारं, खेळणारं गाव दुःखाच्या खाईमध्ये लोटलं होतं.
अपघातानंतर वाडीतील- गावातील ज्याचे त्याचे मोबाईल खणखणत होते. विचारपूस करत होते. दाटलेल्या कंठाने एकमेकांशी बोलत होते. चांडोली ग्रामीण रुग्णालयात मृत्यू पावलेल्या व्यक्तींच्या नातेवाइकांनी कुटुंबातील व्यक्तींनी, तसेच इतरांनी मोठी गर्दी केली होती. मृतांच्या नातेवाइकांचा आक्रोश होता. पापळवाडी, पाईट गाव मात्र या दुर्दैवी घटनेने निःशब्द झाले होते. वाडीकडे रात्री उशिरा मृताचे नातेवाईक, इतर लोक अंत्यविधीसाठी येत होते. रात्री उशिरा मृतांवर अंत्यसंस्कार करण्यात येणार होते. नातेवाइकांची परिसरातील व्यक्तींची मोठी गर्दी होत होती.
श्रावणातील तिसरा सोमवार पाईट परिसरासाठी आणि पापळवाडीसाठी दुःखाचा ठरला होता. वाडीतील व परिसरातील चेहरे अबोल झाले होते. डोळ्यात अश्रू होते आणि नातेवाइकांच्या कुटुंबातील व्यक्तींच्या छातीवर दुःखाचा डोंगर कोसळला होता. वाडीतील जो तो जखमींची विचारपूस करत होता आणि मृत व्यक्तींसाठी अखेरचा टाहो फोडत होता. कोणी सांत्वन करत होते. वाहने धावत होती, परिसर मात्र दुःखाच्या काहूराने गलबलला होता.
....