आरोपी चालकाला दोन दिवस कोठडी

चाकण, ता. १२ : पाईट (ता. खेड) येथील कुंडेश्वर घाट रस्त्यावर पिकअप जीप चढावर मागे आल्याने दरीत कोसळून पलटी झाल्याने दहा महिलांचा मृत्यू झाला. तसेच, अनेक महिला, मुले, मुली जखमी झाली. या प्रकरणी पिकअप जीप चालक आरोपी ऋषिकेश रामदास करंडे (वय २५, रा. पाईट, पापळवाडी) याच्यावर पोलिसांनी रात्री उशिरा गुन्हा दाखल केला होता. त्याला ताब्यात घेऊन अटक करण्यात आली आहे. त्याला खेड न्यायालयाने दोन दिवसांची पोलिस कोठडी दिली आहे.
पिकअप जीप मालवाहतुकीची असताना या वाहनात विनापरवाना दाटीवाटीने टपावर, केबिनमध्ये मागच्या हौद्यात महिला, लहान मुले, मुली यांना बसवून वळणावळणाचा चढाचा घाट रस्ता असताना अपघात होण्याचा धोका आहे, असे माहीत असतानाही या चालकाने वाहन नेण्याचा प्रयत्न केला. महिलांच्या मृत्यूस कारणीभूत झाल्याप्रकरणी आरोपीवर विविध कलमानुसार गुन्हा दाखल केला आहे, असे महाळुंगे पोलिस ठाण्याचे वरिष्ठ पोलिस निरीक्षक दिगंबर सूर्यवंशी व पोलिस निरीक्षक अनिल देवडे यांनी सांगितले.
या अपघाताबाबत सिद्धीका रामदास चोरघे (वय २१) या तरुणीने पोलिसात फिर्याद दिली आहे. या अपघातात या तरुणीची आईही मृत्यूमुखी पडलेली आहे. चालकाच्या विरोधात फिर्याद देण्यासाठी कोणीही प्रथम धजावत नव्हते. हे सर्व एकाच गावातील, तसेच नात्यागोत्यातील आहेत, असे पोलिस उपनिरीक्षक दत्ता जाधव यांनी सांगितले.