कितीही धोकादायक वाहतूक...

चाकण, ता.१८ : मार्गावरून धोकादायकरीत्या वाहतूक होते. केवळ पैशासाठी रिक्षा मधून क्षमतेपेक्षा अधिक प्रवासी बसविले जातात. पण त्याचे कोणालाच काही घेणे देणे नसते. वाहतूक विभागाचे पोलिस कर्मचारी त्याकडे किती गांभीर्याने लक्ष देतात हाही महत्त्वाचा सवाल आहे. अशा या अवैध प्रवासी वाहतुकीमुळे अनेक वेळा अपघात होतात त्यात निष्पाप लोकांचे जीव जातात, पण या अवैध व धोकादायक वाहतुकीवर नियंत्रण येत नाही हे भयानक वास्तव आहे.
चाकण औद्योगिक वसाहतीत व परिसरात धोकादायक वाहतूक मोठ्या प्रमाणात होते मग ती दुचाकीवरून, तीन चाकी,चारचाकी वाहनांतून सर्रास होते, पण या धोकादायक वाहतुकीवर नियंत्रण येत नाही. अगदी बैलगाडा शर्यतीसाठी पिकअप जीप, टेंपोमधून बैल, घोडी नेले जातात. त्या पिकअपच्या टपावर दहा ते पंधरा तरुण बसलेले असतात ही वाहतूक धोकादायक आहे. तसेच रिक्षामध्येही अगदी १२ ते १५ जण जनावरे कोंबल्यासारखी बसवली जातात. त्या रिक्षाचालकालाही रिक्षा चालवणे अवघड होते, परंतु तो केवळ पैसे कमविण्याच्या उद्देशाने रिक्षा चालवतो. काही दुचाकी चालक मोठ्या प्रमाणात दुचाकीवरून मालवाहतूक करतात हे चित्र औद्योगिक वसाहतीत तसेच चाकण परिसरात मोठ्या प्रमाणात दिसते. यावर वाहतूक विभागाच्या वतीने कारवाई करण्यात यावी, अशी मागणी होत आहे. यावर खरच कारवाई होते का हाही प्रश्न निर्माण होत आहे.

रिक्षात बेकायदा प्रवाशांची वाहतूक केली जाते. अनेक प्रवासी कोंबून भरल्यासारखे भरले जातात. त्या रिक्षावर कारवाई केली जाते. परंतु असे प्रकार काही रिक्षा चालक जाणून-बुजून करतात तसेच दुचाकी वरही मोठ्या प्रमाणात मालाची वाहतूक केली जाते. पिकअप टेम्पो, जीपमध्ये बेकायदा प्रवासी वाहतूक केली जाते. टपावर अनेक जण बसतात. यावरही कारवाई केली जाते; परंतु हे बेकायदा आहे असे माहीत असताना सुद्धा काही जण जाणूनबुजून असे प्रकार करतात.
- प्रमोद वाघ, वरिष्ठ पोलिस निरीक्षक, चाकण वाहतूक विभाग