चाकणमधील मार्गांवर खड्ड्यांचे जाळे

चाकण, ता. २२ : परिसरात गेल्या आठवड्याभरापासून जोराचा पाऊस होत असल्यामुळे पुणे- नाशिक महामार्ग, चाकण- तळेगाव, चाकण- शिक्रापूर मार्गावर मोठ्या प्रमाणात खड्डे पडले आहेत. त्यामुळे वाहतुकीला अडथळा निर्माण होत असून, वाहतूक कोंडीत आणखी भर पडत आहे. मात्र, मार्गावरील खड्डे बुजविण्याकडे कोणीच लक्ष देत नाही.
चाकण (ता. खेड) परिसरातील मार्गावर पावसामुळे मोठ्या प्रमाणात खड्डे पडले आहेत. खड्डे दोन- तीन फुटाचे झाले आहेत. खड्ड्यांमध्ये मोठ्या प्रमाणात पावसाचे पाणी साचले आहे. त्यामुळे खड्ड्यांना तळ्याचे स्वरूप आले आहे. हे खड्डे बुजवण्याकडे राष्ट्रीय राजमार्ग प्राधिकरण एमएसआयडीसी, सार्वजनिक बांधकाम विभाग कोणीच लक्ष देत नाही. त्यामुळे मार्गाची अवस्था अतिशय बिकट झाली आहे. यामुळे नागरिक, कामगार, प्रवासी, विद्यार्थी, शेतकरी, उद्योजक, व्यावसायिक त्रस्त झाले आहेत.
याबाबत उद्योजक श्यामराव देशमुख यांनी सांगितले की, ‘‘पर्यायी रस्त्यांची मोठ्या प्रमाणात दुरवस्था झाली आहे. पर्यायी रस्त्याची कामे केली पाहिजे. मार्गावर जो मुरूम टाकला जातो तो माती मिश्रित असल्याने चिखल होतो. त्यामुळे दुचाकी चालकांचे अपघात होतात. अनेकांना जीव गमवावा लागतो. काही जण जखमी होतात. रस्ता जीएसबी पद्धतीचा मुरूम, खडी टाकून करण्यात यावा. मार्गावर वाहतूक कोंडी मोठ्या प्रमाणात होत आहे. एमआयडीसी फाट्यावरील स्पायसर कंपनी येथील पूल हे अरुंद आहेत. त्या पुलांची रुंदी वाढवली पाहिजे. तसेच, चाकण मार्गावर पोलिस चौक्यांचा मोठा प्रमाणात अडसर आहे. याकडे प्रशासन का दुर्लक्ष करत आहे, असा आरोप आमचा आहे.’’