चाकणच्या बाजारात खरेदीसाठी गर्दी

चाकण, ता. २६ : येथील बाजारात गणेशोत्सवामुळे फुले, हार, पूजेचे साहित्य व फळे खरेदीसाठी मोठी गर्दी आहे. त्यामुळे बाजारात मोठी आर्थिक उलाढाल होत आहे. बाजारात तेजी आली आहे. दर वीस टक्क्यांनी वाढले आहेत, असे व्यापाऱ्यांनी सांगितले.
गणेशोत्सवासाठी विशेषतः झेंडू, गुलाब मोगरा, ॲस्टर, शेवंती, कमळाची फुले या फुलांना सजावटीसाठी व पूजेसाठी अधिक मागणी आहे.  त्यामुळे फूल विक्रेत्यामध्ये, शेतकऱ्यांमध्ये उत्साह आहे. तसेच, केळी, पेरू, सीताफळ, सफरचंद, संत्री, मोसंबी, डाळिंब या फळांना अधिक मागणी आहे.
झेंडूची फुले दोनशे रुपयाला प्रतिकिलोने विकली जात आहेत. गुलाबाचे एक फूल वीस रुपयाला एक असे विकले जात आहे. हारांच्या किमतीही तीस ते पन्नास टक्क्यांनी वाढल्या आहेत. केवडा , दूर्वा, कमळाची फुले यांच्या किमती वाढल्या आहेत. केवड्याचे एक पान अगदी वीस रुपयाला विकले जात आहे. तुळशीच्या पानाची एक जुडी, दुर्वांची जुडी वीस रुपयाला विकली जात आहे.
नैसर्गिक फुले, हार यांना मागणी असली, तरी कृत्रिम फुलांच्या हारांनाही मागणी आहे. तसेच, पूजेचे साहित्य, सजावटीचे साहित्य व इतर विद्युत साहित्य, रंगीबेरंगी कागद व इतर साहित्याला मोठी मागणी असल्याचे विक्रेते प्रवीण कर्नावट, बाळासाहेब फुलवरे यांनी सांगितले.
चाकण औद्योगिक वसाहतीतील विविध कंपन्यांत गणेश मूर्तींची प्रतिष्ठापना केली जाते. कंपनीतील कामगार वर्गाची मोठ्या प्रमाणात खरेदी सुरू आहे.