पोदार स्कूलमध्ये बुद्धिबळ स्पर्धा

चाकण, ता. ३० : ‘‘डायरेक्टर ऑफ स्पोर्ट्स अँड युथ सर्व्हिसेस, महाराष्ट्र शासन यांच्या वतीने क्रीडा स्पर्धांचे आयोजन केले जाते. त्या अनुषंगानेच येथील पोदार इंटरनॅशनल स्कूल, रोहकल या प्रशालेमध्ये तालुकास्तरीय बुद्धिबळ स्पर्धा आयोजित केली होती,’’ अशी माहिती प्राचार्य विशाल जाधव यांनी दिली.
अश्विनी हातरगे, दीप्ती शिदोरे, अभिजित महाजन, विशाल जाधव, राजेंद्र कोंडे, नितीन वरकड, दीपा कासवा यांच्या हस्ते दीपप्रज्वलन व सरस्वती पूजन करण्यात आले. स्पर्धेसाठी पंच म्हणून गुरुजीत सिंग, सिद्धार्थ सरोदे, धीरज पाटील यांचे मार्गदर्शन झाले. या स्पर्धेत तालुक्यातील तब्बल १३० शाळांनी आपला सहभाग नोंदविला. यात विविध वयोगटातील एकूण ५८८ विद्यार्थ्यांनी सहभाग नोंदवून बुद्धिबळाचे कसब दाखवले.
यामध्ये विविध शाळांतील ३० विद्यार्थी जिल्हास्तरीय स्पर्धेसाठी पात्र ठरले आहेत. पात्र विद्यार्थ्यांचा प्रशालेच्या वतीने अजित थिगळे, प्रियांका थिगळे, नितीन वरकड, सिंग यांच्या हस्ते सन्मानचिन्ह व पुष्प देऊन सन्मान करण्यात आला. विद्यार्थी सिद्धी कांबळे, शौर्य चौधरी, शिक्षक विवेक पिसाळ यांनी सूत्रसंचालन केले.