मेदनकरवाडीत पेट्रोल पंपावरील कामगाराला मारहाण

चाकण, ता.३१: पुणे-नाशिक महामार्गावरील पेट्रोल पंपावरील एका कामगाराला शिवीगाळ मारहाण केली व त्याच्याकडे पाच हजार रुपयांची खंडणी मागितली. याप्रकरणी आरोपी अतुल तांबे (वय १९, रा. खंडोबा माळ, चाकण), सोहम माने (वय १८, रा.वराळे, ता.खेड), ओंकार बागल (वय-२०, रा. देहूगाव ता. हवेली) यांच्यावर विविध कलमानुसार गुन्हा दाखल केला व त्यास अटक केली आहे, अशी माहिती चाकण पोलिस ठाण्याचे वरिष्ठ पोलिस निरीक्षक संजय सोळंके यांनी दिली.
पोलिसांनी दिलेल्या माहितीनुसार, हा प्रकार काल रात्री सव्वा बाराच्या सुमारास घडला. फिर्यादी सचिन बिरादार (वय-३०) हे पुणे-नाशिक महामार्गावरील मेदनकरवाडी (ता .खेड) गावच्या हद्दीतील देवेंद्र ऑटोलाइन्स भारत पेट्रोल पंप येथे वाहनांमध्ये पेट्रोल भरण्याचे काम करत होते. त्यावेळी तिघा आरोपींनी फिर्यादी कडून फुकटमध्ये नव्वद रुपयाचे पेट्रोल भरून घेतले व पंप चालवायचा असल्यास आम्हाला पाच हजार रुपये हप्ता द्यावा लागेल, नाहीतर पेट्रोल फुकटात भरावे लागेल, असे बोलले. त्यावेळी फिर्यादीकडून आरोपींनी पैशाची मागणी केली. त्यांना फिर्यादीने विरोध केला. यावेळी आरोपीने फिर्यादीला जबर मारहाण करून दुखापत केली. फिर्यादी यांचे सहकारी भांडण सोडविण्यासाठी आले. त्यावेळी त्यांना देखील मारहाण करून शिवीगाळ केली. ते ‘आम्ही इथले भाई आहोत,’ असे मोठ्याने ओरडले. दरम्यान, त्यांच्या या कृत्याने इंधन भरण्यासाठी आलेले इतर वाहनचालक घाबरून पळून गेले.