कडाचीवाडी- बापदेववस्ती रस्त्याची दुरवस्था

चाकण, ता. १ : कडाचीवाडी गावठाण ते बापदेव वस्ती, दलित वस्ती, आदिवासी ठाकरवाडीकडे जाणाऱ्या रस्त्याची मोठ्या प्रमाणात दुरवस्था झाली आहे. या रस्त्यावर मोठमोठे खड्डे पडले आहेत. पावसाचे पाणी त्यात साचले आहे. त्यामुळे वाहनचालकांना वाहन चालविताना कसरत करावी लागत आहे. या रस्त्याची दुरुस्ती तातडीने करावी, अशी मागणी ग्रामस्थांनी केली आहे. याबाबत खेडचे तहसीलदार प्रशांत बेडसे पाटील यांना ग्रामस्थांच्या वतीने निवेदन देण्यात आले आहे.
चाकण (ता. खेड) येथील कडाचीवाडी गावठाण ते बापदेव वस्ती या रस्त्याची अनेक वर्षापासून दुरवस्था आहे. मार्गावर मोठ्या प्रमाणात कामगारांची वस्ती, तसेच विविध नगरे आहेत. हा मार्ग बापदेववस्ती पुढे दलित वस्ती तसेच आदिवासी ठाकरवाडीकडे जातो. हा मार्ग ४० वर्षापासून वापरात आहे. त्या ठिकाणी शासकीय निधीद्वारे चांगला मार्ग करायचा आहे. मात्र, या गटातील काही शेतकरी त्या ठिकाणी अडचण निर्माण करत आहेत. या मार्गाला पर्यायी रस्ता म्हणून जुना निघोजे शीव रस्ता खुला करण्यात यावा. या जुन्या निघोजे शीव रस्त्यामध्ये काही लोकांनी अतिक्रमण केले आहे. या रस्त्यावरील अतिक्रमणे मोकळे करून हा रस्ता मोकळा करावा. कडाचीवाडी ते मेदनकरवाडी येथील शीव रस्ता कडाचीवाडी गावठाण ते बापदेव वस्तीपर्यंत खुला करून मिळावा, अशी मागणी निवेदनात केली आहे.

09210