चाकण औद्योगिक वसाहतीतील रासायनिक सांडपाण्याचा प्रश्‍न

चाकण, ता. १४ : येथील औद्योगिक वसाहतीतील महाळुंगे (ता. खेड) गावच्या हद्दीतील एचपी कंपनी जवळील मोकळ्या जागेत कंपन्यांनी सोडलेले रासायनिक विषारी सांडपाणी पिल्याने सतरा मादी मेंढ्या आणि एक नर अशा अठरा मेंढ्यांचा सोमवारी (ता. १) मृत्यू झाला होता. पोलिसांनी राज्य प्रदूषण नियंत्रण मंडळाला याबाबत कळविले परंतु त्यानंतरही काही झाले नाही. पोलिसांनी फक्त कागदोपत्री संबंधित कंपनीवर गुन्हा दाखल केला. या घटनेत मेंढपाळ बाळू कोकरे यांचे अडीच लाख रुपयांचे नुकसान झाले. या मेंढपाळाला भरपाई मिळणार का? असा प्रश्‍न उपस्थित झाला आहे.
या घटनेची कोकरे यांनी पोलिसात फिर्याद दिली. त्यानंतर पंचनामा झाला. ही माहिती महाराष्ट्र प्रदूषण नियंत्रण मंडळाला कळविली आहे. वसाहतीतील काही कंपन्या रासायनिक विषारी सांडपाणी ओढ्यात, नाल्यात सोडतात. त्यामुळे हे धोके उद्भवत आहेत, पण याकडे महाराष्ट्र औद्योगिक विकास महामंडळ (एमआयडीसी) तसेच राज्य प्रदूषण नियंत्रण मंडळ लक्ष देत नाही असाही आरोप होत आहे. चाकण परिसरात औद्योगिक वसाहतीत कंपन्यांचे सांडपाणी वाहून नेण्याची व्यवस्था नाही. कंपनीने त्यांचे सांडपाणी त्यांच्या जागेत सोडले पाहिजे ते बाहेर जाऊ दिले नाही पाहिजे त्यावर प्रक्रिया केली पाहिजे असे औद्योगिक विकास महामंडळाचे म्हणणे आहे.

मेंढ्या रासायनिक विषारी सांडपाणी पिल्याने मृत्यूमुखी पडल्या. त्याबाबतचा अहवाल राज्य प्रदूषण नियंत्रण मंडळाला दिलेला आहे. त्यामुळे त्यांनी कोणत्या कंपन्या रासायनिक विषारी सांडपाणी सोडतात याकडे लक्ष दिले पाहिजे. त्याची माहिती आम्हाला दिली तर संबंधित कंपन्यांवर आम्ही गुन्हा दाखल करू.
दिगंबर सूर्यवंशी, वरिष्ठ निरीक्षक, महाळुंगे पोलिस ठाणे

संबंधित क्षेत्रीय अधिकाऱ्यांनी या पाण्याचे नमुने घेतलेले आहेत. त्याची तपासणी प्रयोगशाळेत होणार आहे. त्यानंतर ज्या कंपन्या असे पाणी सोडतात त्यांच्यावर गुन्हा दाखल होईल.
नितीन गोरे, सदस्य, महाराष्ट्र प्रदूषण नियंत्रण मंडळ