अंगणवाडी सेविकेला वाकीत लुटण्याचा प्रयत्न

चाकण, ता. ३० : वाकी खुर्द (ता. खेड) येथील एका अंगणवाडी सेविकेला एकाचा पत्ता विचारण्याचा बहाणा करून तिला चाकूचा धाक दाखवून तिच्या गळ्यातील मिनी सोन्याचे गंठण पळविण्याचा चोरट्याने प्रयत्न केला. तिने आरडाओरडा केल्यानंतर चोरटा पळून गेला. याप्रकरणी चोरट्यावर गुन्हा दाखल केल्याची माहिती चाकण पोलिस ठाण्याचे वरिष्ठ पोलिस निरीक्षक संजय सोळंके यांनी दिली. हा प्रकार बुधवारी (ता. २९) सकाळी पावणेदहाच्या सुमारास घडला. सुरेखा वहिले यांनी सकाळी पावणे दहाच्या सुमारास अंगणवाडी उघडली. त्या दरवाजात उभ्या राहून मुलांची वाट पाहत होत्या. त्यावेळेस अचानक चोरटा तिथे आला, त्याने मोरे येथे आहेत का? असे वहिले यांना विचारले. त्यावेळी त्यांनी मोरे आडनावाचे येथे कोणी नाही, असे उत्तर दिले. त्याने पुढे येऊन चाकूचा धाक दाखवून गळ्यातील मिनी गंठण ओढून चोरी करण्याचा प्रयत्न केला. त्यानंतर वहिले यांनी आरडाओरडा केल्यानंतर तो पळून गेला.