पिसाळलेल्या कुत्र्याचा ३३ जणांना चावा

चाकण, ता. ४ : येथील तळेगाव चौक ते आंबेठाण चौक, महात्मा फुले चौक, मार्केटयार्ड या परिसरात रविवारी (ता. ४) सकाळी नऊ ते दुपारी एकच्या सुमारास पिसाळलेल्या कुत्र्याने धुमाकूळ घालत तब्बल ३३ जणांना चावा घेतल्याची घटना घडली.
अचानक झालेल्या या प्रकारामुळे परिसरात पादचारी व नागरिकांमध्ये भीतीचे वातावरण पसरले आहे. या पिसाळलेल्या कुत्र्याने रस्त्यावरून ये- जा करणाऱ्या लोकांना चावा घेतला आहे.
चावा घेतलेल्या जखमींना तातडीने चाकण (ता. खेड) येथील ग्रामीण रुग्णालयात उपचारासाठी दाखल केले आहे. रुग्णालयात आलेल्या रुग्णांना रेबीज प्रतिबंधक लस, तसेच पिसाळलेल्या कुत्र्याची लस, सिरम देण्यात येत आहे. सर्वांची प्रकृती स्थिर आहे. पिसाळलेल्या कुत्र्याची लस मागवून घेण्यात आली आहे. काही रुग्णांना पिंपरी चिंचवड येथील वायसीएम रुग्णालयात पाठवले आहे, अशी माहिती चाकण ग्रामीण रुग्णालयाचे वैद्यकीय अधीक्षक डॉ. सचिन कांबळे यांनी दिली.
या पिसाळलेल्या कुत्र्याने तळेगाव चौक येथे सकाळी नऊच्या सुमारास चावा घेण्यास सुरुवात केली. यामध्ये लहान मुलांची संख्या जास्त आहे. दरम्यान, या पिसाळलेल्या कुत्र्याने इतरही कुत्र्यांना चावा घेतला आहे. या कुत्र्याला काही तरुणांनी मारले असल्याचेही काही जणांनी सांगितले.
पिसाळलेल्या कुत्र्याने चार लहान मुले, सात महिला, २२ पुरुष यामध्ये ज्येष्ठ नागरिक यांनाही चावा घेतला. ग्रामीण रुग्णालयात जेवढी लस उपलब्ध होती, सिरम उपलब्ध होते तेवढ्या रुग्णांना दिलेली आहे. काही रुग्णांच्या जखमा मोठ्या होत्या. त्यामुळे त्यांना पिंपरी चिंचवड येथील रुग्णालयात पाठविले आहे, असे डॉ. पंकज म्हस्के यांनी सांगितले.