चाकणमध्ये जुगारप्रकरणी ७ ज्येष्ठांवर गुन्हा दाखल

चाकण, ता. ८ : येथील खंडोबा माळ येथे एका मंदिराच्या शेजारी असलेल्या पत्राशेडमध्ये बेकायदा तीन पत्ती जुगार खेळत असताना व पैसे टाकण्याची चढाओढ करत असताना सात ज्येष्ठ नागरिकांना पोलिसांनी ताब्यात घेतले. त्यांच्याकडून ९०६० रुपये रोख रक्कम, पत्त्याचे पाच कॅट व एक वही, असा सुमारे ९३३५ रुपयाचा मुद्देमाल जप्त केला. याप्रकरणी पोलिसांनी सात ज्येष्ठ नागरिकांवर मुंबई जुगार कायदा कलमानुसार गुन्हा दाखल केला आहे.
याबाबत चाकण उत्तर पोलिस ठाण्याचे वरिष्ठ पोलिस निरीक्षक जितेंद्र कदम यांनी माहिती दिली की, हा प्रकार बुधवारी (ता. ८) दुपारी तीनच्या सुमारास घडला. आरोपी खंडोबा माळ येथे चैतन्य कानिफनाथ मंदिराच्या शेजारी पत्राशेडमध्ये बेकायदा तीन पत्ती जुगार खेळत होते. त्यावेळी कारवाई केली. फिर्याद पोलिस शिपाई शरद खैरनार यांनी दिली.