मशिनच्या पार्टसची चाकणला चोरी

चाकण : येथील चाकण-शिक्रापूर मार्गाचे रुंदीकरण, डांबरीकरणाचे काम करणाऱ्या संबंधित ठेकेदार कंपनीच्या पेव्हर मशिनचे पार्ट चोरट्यांनी रात्रीच्या वेळेस चोरून नेले. सुमारे १ लाख ७० हजार रुपयांचे स्पेअर पार्ट चोरून नेले. याबाबत पोलिसांना माहिती देण्यात आली आहे. अगोदरच मार्गाच्या कामाला विलंब होत आहे त्यात अशा प्रकारच्या चोऱ्या होत असल्याने रस्त्याचे काम कसे मार्गी लागणार असा प्रश्न ट्रॅफिक मुक्त चाकण कृती समितीचे सदस्य कुणाल कड यांनी केला आहे. दरम्यान, चाकण औद्योगिक वसाहतीमुळे चाकण परिसरात मोठ्या प्रमाणात भंगार विक्रेते आहेत. अनेकांनी भंगार व्यवसाय थाटलेला आहे, त्यामध्ये कंपन्यांतील चोरीचा माल, मशिनचे सुटे पार्ट काही लोक विकतात तेथून ते पुणे, मुंबई ,पिंपरी चिंचवड व इतर भागात हलविले जातात. या भंगार विक्रेत्यांकडेही याची चौकशी करण्यात यावी अशी मागणी होत आहे.