चाकणमधील बेपत्ता मुलचा लोणावळ्यात शोध

चाकण, ता. ४ : नाणेकरवाडी (ता. खेड) येथून बेपत्ता झालेला ११ वर्षाचा चौथीत शिकणारा मुलगा घरातून निघून गेला होता. लोणावळा येथे तो फिरताना आढळला. त्यानंतर एका व्यक्तीने त्याला पोलिस ठाण्यात नेले. चाकण पोलिसांनी त्याला लोणावळा येथून आणून त्याच्या वडिलांच्या ताब्यात दिले. राज मुनीलाल यादव असे या अल्पवयीन मुलाचे नाव आहे, अशी माहिती चाकण दक्षिण पोलिस ठाण्याचे वरिष्ठ पोलिस निरीक्षक संजय सोळंके, साहाय्यक पोलिस निरीक्षक राहुल पाटील यांनी दिली.
पोलिसांनी दिलेल्या माहितीनुसार, ‘‘हे कुटुंब मूळचे बिहारचे असून, सध्या कामानिमित्त नाणेकरवाडी येथे भाड्याच्या खोलीत राहत आहे. राज यादव हा मुलगा रविवारी (ता. १) रात्री साडेआठच्या सुमारास घरातून निघून गेला होता. याबाबत पोलिसात त्याचे वडील मुनीलाल जयराम यादव यांनी फिर्याद दिली होती. मुनीलाल यादव हे मजुरी करतात. पोलिस ठाण्यात फिर्याद दाखल झाल्यानंतर पोलिसांनी अनोळखी आरोपीवर गुन्हा दाखल केला होता. पोलिसांच्या पथकाने परिसरातील अनेक सीसीटीव्ही फुटेज तपासले व काही तांत्रिक तपास केला. त्यानंतर समाज माध्यमावरही माहिती दिली. त्यानंतर हा मुलगा लोणावळा येथे असल्याचे समजले. त्यानंतर त्या मुलाला एका व्यक्तीने लोणावळा पोलिस ठाण्यात नेले. चाकण मंगळवारी (ता. ४) पोलिस त्या मुलाला आणण्यासाठी लोणावळ्याला गेले. ही कारवाई वरिष्ठ पोलिस निरीक्षक संजय सोळंके यांच्या मार्गदर्शनाखाली, साहाय्यक पोलिस निरीक्षक राहुल पाटील, पोलिस शिपाई चव्हाण, फापाळे, माटे, आदम, खेडकर यांच्या पथकाने केली व त्या मुलाला ताब्यात घेतले. रात्री नऊच्या सुमारास वडिलांच्या ताब्यात त्या मुलाला देण्यात आले.