भीमा नदीला उन्हाळ्यात पहिल्यांदाच पूर

चास, ता. १३ : खेड तालुक्याच्या पश्चिम पट्ट्यात मंगळवारी (ता. १३) सर्वदूर अवकाळी पावसाने दाणादाण उडवली आहे. ढगफुटीप्रमाणे झालेल्या पावसामुळे जनजीवन विस्कळित झाले. सहा दिवसांत सलग पाच वेळा अवकाळी पावसाने दमदारपणे हजेरी लावली. भीमा नदीला उन्हाळ्यात पहिल्यांदाच पूर पाहायला मिळाला. चासकमान धरण परिसरात एका तासात तब्बल ७४ मिलिमीटर पावसाची नोंद झाली आहे.

अवकाळीमुळे शेतांचे बांध फुटले. पिके गाडली गेली. कापणीस आलेली बाजरीची पिके भुईसपाट झाले. उन्हाळी भुईमुगासह काढणीला आलेल्या कांद्याचे मोठे नुकसान झाले असून मका पिकासह अनेक उन्हाळी हंगामातील पिकांचे मोठे नुकसान झाले आहे. मात्र, मंगळवारी (ता. १३) दुपारी झालेल्या पावसाने सगळ्यात जास्त नुकसान केले. सोसाट्याच्या वाऱ्यासह विजांच्या कडकडाटात मुसळधार पावसाला दुपारी सुरुवात झाली. पावसाचा जोर एवढा होता की समोरचे काहीही दिसत नव्हते.
कडधे, कान्हेवाडी, कमान, पापळवाडी, बहिरवाडीस मिरजेवाडी यांसह अन्य परिसरातील व प्रामुख्याने डोंगरच्या पायथ्यांच्या भागात मुसळधार पावसाने ओढ्या नाल्यांना पूर आल्याने पुराचे पाणी थेट शेतात घुसले. शेतांचे बांध फुटले, पिके वाहून गेली, वैरण वाहून गेली, काढून साठवून ठेवलेल्या कांद्यामध्ये पाणी साचल्याने मोठे नुकसान झाले.

शिरूर-भीमाशंकर मार्गावर वाहतूक ठप्प
कमान येथे ओढ्याच्या पुराचे पाणी शिरूर-भीमाशंकर मार्गावर आल्याने या मार्गावरील वाहतूक काही काळ ठप्प झाली होती. तसेच ओढ्याच्या पात्रातील पुलावरील तसेच जोडणाऱ्या भागावरील भराव वाहून गेल्याने पूल वाहतुकीस पूर्णपणे बंद झाला आहे. आखरवाडी येथे रस्त्यावर बाभळीचे झाड पडल्याने शिरूर-भीमाशंकर मार्गावरील वाहतूक ठप्प झाली होती. मात्र पावसाचा जोर कमी होताच सरपंच नीलम मुळक, उपसरपंच दत्तात्रेय मुळूक, अविनाश मुळूक, प्रसाद नाईकरे, गणेश शितोळे, ओंकार मुळूक, दिलीप मुळूक, शत्रुघ्न खांडगे यांनी झाड तोडून रस्ता वाहतुकीस खुला केला.

03378, 03380