खेडमध्ये अवकाळीमुळे हिरडा उद्‌ध्वस्त

चास, ता.१५ : खेड तालुक्याच्या पश्चिम पट्ट्यात गेली काही दिवस होत असलेल्या मुसळधार अवकाळी पावसामुळे आदिवासी नागरिकांचा मुख्य उत्पन्नाचा स्त्रोत हिरडा पूर्णपणे उद्‌ध्वस्त झाला आहे. हिरड्याच्या झाडावरील मोहोर गळाल्याने आदिवासींचे उत्पन्नाचे मुख्य साधन हिरावले आहे. तसेच राब भाजणी रखडली असून गुरांचा पेंढा भिजून काळा पडला आहे.
आदिवासी भागात उत्पन्नाचे मुख्य साधन म्हणजे एकमेव हिरडा असून, काही दिवसांपूर्वी हिरड्यांच्या झाडाला पालवी फुटली. चांगला बहर आला, हिरड्याची झाडेही फुलोऱ्याने (मोहराने) बहरली होती तर काही झाडांना हिरडाही लगडला होता. मात्र, गेली काही दिवसांपासून पडत असलेल्या अवकाळी पावसाने तसेच त्या बरोबर आलेल्या गारांच्या पावसाने हिरड्याचा बहर गळाल्याने हिरडा येणे दुरापास्त झाला आहे. याबाबत बोलताना डेहणेचे माजी सरपंच तसेच आदिवासींचे नेते दत्तात्रेय खाडे म्हणाले की, गेली काही दिवस होत असलेल्या पावसाने हिरड्याचे प्रचंड नुकसान झाले आहे. हिरड्याचा मोहोर झडून गेला आहे. मोहोर गळाल्याने हिरडा लागणार नसून, आमचा उत्पन्नाचा मुख्य स्रोत नष्ट झाला आहे.
पावसाळ्यासाठी साठवून ठेवलेला जनावरांसाठी चारा (भाताचा पेंढा) भिजल्याने काळा पडला आहे. भात रोपे तयार करण्यासाठी जमिनीची भाजणी होऊ शकली नाही. नाचणी व वरीची शेत भाजणी होऊ शकली नाही त्यामुळे या पिकांच्या लागवडीची कालावधी वाढणार आहे. उत्पन्नात फरक होणार आहे. पाणी असलेल्या भागात बाजरी, कांदा, लसूण ही पिके घेतली होती मात्र त्याचेही नुकसान झाले असून, आपल्या आदिवासी भागात संस्था संघटना यांनी लक्ष घालून, सर्व ग्रामपंचायतीने ठराव घेऊन तहसील कार्यालयात निवेदन पाठवावे व नुकसानीचे पंचनामे करून नुकसान भरपाई मिळण्यासाठी प्रयत्न करावेत असेही खाडे म्हणाले.
03388,
03387