‘खेडमधील नुकसानीचे पंचनामे करा’

चास, ता.३० : खेड तालुक्यात गेली पंधरा दिवसांपासून होत असलेल्या मुसळधार पावसामुळे नुकसानग्रस्त झालेल्या शेतकऱ्यांच्या नुकसानीचे पंचनामे करून नुकसान भरपाई देण्याची मागणी खेड तालुका राष्ट्रवादी लीगल सेलचे अध्यक्ष ॲड. अरुण मुळूक तसेच अन्य सदस्यांनी तहसीलदारांकडे निवेदनाव्दारे केली आहे.
गेली पंधरा ते वीस दिवसांपासून संपूर्ण राज्यभर मुसळधार पाऊस कोसळतो आहे. खेड तालुक्यात काढणीस आलेली उन्हाळी पिके त्यामध्ये कांदा, भुईमूग, बाजरी, प्लॉवर, मेथी, कोबी, कोथिंबीर, केळी, आंबा, फळपिके व इतर उन्हाळी बागायती पिकांचे तसेच जमिनीचे मोठे नुकसान होवुन शेतकऱ्यांची पिके शेतातच सडून चालली आहेत. संपूर्ण खेड तालुक्यातील शेती उद्ध्वस्त होवुन शेतकऱ्यांचे मोठे नुकसान झालेले आहे. शेतकरी मोठ्या अडचणीत सापडला आहे. शासनाकडून नुकसान झालेल्या पिकांचे, जमिनीचे तातडीने पंचनामे होऊन महाराष्ट्र शासनाने शेतकरी बांधवांना नुकसान भरपाई द्यावी. पीककर्ज माफ व्हावे, अशी मागणी खेड तालुका राष्ट्रवादी लिगल सेलच्या वतीने तहसीलदार प्रशांत बेडसे यांना निवेदन देवून करण्यात आली.
यावेळी खेड तालुका राष्ट्रवादी लीगल सेलचे अध्यक्ष ॲड अरुण मुळूक, राष्ट्रवादी लीगल सेल जिल्हा सचिव ॲड आश्विनी मडके, माजी जिल्हा सरकारी वकील रजनी नाईक, राजगुरुनगर बार असोसिएशनचे उपाध्यक्ष ॲड शंकर कोबल, लीगल सेलचे उपाध्यक्ष ॲड अनिल वाडेकर, ॲड माणिक वायाळ, ॲड रमेश हुरसाळे, ॲड. आरती टाकळकर, ॲड. सविता पाटोळे, ॲड प्रशांत दौंडकर, ॲड अभिजित जाधव यांसह अन्य मान्यवर उपस्थित होते.