भुईमूग, सोयाबीनच्या पेरण्यांना वेग

चास, ता.१४ : खेड तालुक्याच्या पश्चिम पट्टातील अनेक भागामध्ये पावसाने विश्रांती घेतली आहे. काही दिवसांपासून पावसाने उघडीप दिल्याने खरीप हंगामातील भुईमूग, सोयाबीनसह अन्य पिकांच्या पेरण्यांना वेग आला आहे. भाताच्या पेरण्याही सुरू आहेत.

गेली अनेक वर्षांपासून खेडच्या पश्चिम पट्ट्यात जून महिन्याच्या सुरुवातीला मॉन्सूनपूर्व पावसाने शेतकऱ्यांना साथ दिली नव्हती. त्यामुळे शेतीच्या मशागती उशिरा होऊन पर्यायाने पेरणी वा लागवडी उशिरा झाल्याने उत्पादनात घट येत होती. मात्र, यंदा चित्र वेगळेच आहे. मुसळधारपणे बरसणाऱ्या पावसाच्या विश्रांतीची शेतकरी वाट पाहात होते. पावसाने बळिसाजासह सर्वसामान्य नागरिकांची तारांबळ उडवली होती. सततच्या पावसामुळे जमिनीत वापसा नसल्याने पेरणीपूर्व मशागती रखडल्या होत्या. मशागती नसल्याने पेरण्या करता येत नव्हत्या मात्र गेली काही दिवसांपासून पावसाने विश्रांती घेतल्याने शेतीच्या मशागतींना वेग आला असून पेरण्यांनाही सुरुवात झाली आहे. पाऊस थांबल्याने शेतकऱ्यांना शेतीची कामे करणे सोपे झाले असून खरिपाच्या पेरण्यांना वेग आला आहे, असे प्रगतशील दत्तात्रेय बुरूड, मनाजी आढारी, नंदकुमार बुरूड आदी शेतकऱ्यांनी सांगितले.

खेडच्या पश्चिम पट्यात खरीप हंगामात भुईमूग, बाजरी, सोयाबीन, बटाटा, भात व तत्सम पिकांच्या पेरणी वा लागवडी केल्या जातात, काही भागात भातरोपे लागवडीसाठी साळीच्या पेरण्या झाल्या असून सोयाबीन पिकाच्या बाबतीत पावसाने ओढ दिली तरी पीक तग धरणारे असल्याने गेली काही वर्षांपासून सोयाबीनच्या क्षेत्रात वाढ होत असल्याचे चित्र आहे.
03476