चास येथील जवाहर विद्यालयात योगदिन साजरा

चास, ता. २१ : चास (ता. खेड) येथील रयत शिक्षण संस्थेच्या जवाहर विद्यालयात जागतिक योग दिन साजरा केला. यावेळी सर्व विद्यार्थ्यांसह शिक्षक सहभागी झाले होते.
जवाहर विद्यालयाचे मुख्याध्यापक यादव चासकर यांच्या मार्गदर्शनाखाली विद्यालयाच्या उपशिक्षिका कीर्ती गंभीर यांनी विद्यालयात जागतिक योग दिनाचे महत्त्व विशद करून योगाची प्रात्यक्षिके विद्यार्थ्यांसमोर सादर केली. यावेळी विद्यालयातील ४५० विद्यार्थी व १८ शिक्षक प्रात्यक्षिकात सहभागी झाले होते. यामध्ये प्रामुख्याने प्राणायाम, सुदर्शन क्रिया, योगा, मेडिटेशन, योगासने यांचा समावेश होता. योगाभ्यासाने रोगाशी लढण्याची शक्ती वाढते, शरीर निरोगी आणि मजबूत होते, स्नायूंना बळ मिळते, त्याचबरोबर तणाव दूर होतो. योग हा केवळ शारीरिक व्यायाम किंवा रोग बरी करण्याची कृती नसून जीवन सुधारण्याचा मार्ग आहे, असे मत विद्यालयाचे मुख्याध्यापक यादव चासकर यांनी व्यक्त केले. विद्यालयाचे पर्यवेक्षक किशोर जगताप, सुनीता घेवडे, महेश सुरवसे, राकेश ठोकळ, गीता बागल, आशा राऊत, राकेश ठोकळ, स्वाती टाकळकर, कपिल तिरपुडे, प्रतिमा कडलग, पूनम वाघ, कविता जोशी, दिनेश लाडके, कोकाटे उपस्थित होते. सोहम मुळूक व संचित मुळूक या दोन विद्यार्थ्यांनी मार्गदर्शनपर प्रात्यक्षिके सर्वांसमोर सादर केली.
कीर्ती गंभीर यांनी प्रास्ताविक केले. महेंद्र जोशी यांनी आभार मानले.