भीमाशंकर आराखड्यात खेडचे प्रश्‍न घ्या : वनघरे

चास, ता. १० : खेड तालुक्यातील श्री क्षेत्र भीमाशंकर व परिसराचा विकास आराखडा करण्यात आला असून, त्यात खेड तालुक्यातील प्रश्नांचा समावेश करून देवस्थानबाबत असलेल्या समस्या निवारण करण्याची मागणी खेड बाजार समितीचे माजी उपसभापती व संचालक, तसेच भोरगिरी-भीमाशंकर-भिवेगावचे माजी सरपंच विठ्ठल वनघरे यांनी जिल्हाधिकाऱ्यांकडे निवेदनाद्वारे केली आहे.
त्र्यंबकेश्र्वर येथे होणाऱ्या कुंभमेळ्याबाबत श्री क्षेत्र भीमाशंकर येथे भक्तांच्या होणाऱ्या संभाव्य गर्दीबाबत शासनाने सुमारे १८८ कोटी रुपयांच्या विकासकामांचे नियोजन केले आहे. याला अनुसरून विठ्ठल वनघरे यांनी जिल्हाधिकाऱ्यांना निवेदन दिले आहे. त्यात म्हटले आहे की, श्री क्षेत्र भिमाशंकर हे देवस्थान खेड तालुक्यात आहे. मात्र, या देवस्थानकडे जाण्यासाठी थेट खेड तालुक्यातून रस्ता नाही. त्यामुळे आंबेगाव तालुक्यातून जावे लागते. भीमाशंकर देवस्थान हे बारा ज्योर्तिंलिंगांपैकी एक असल्याने देवस्थानला विकासासाठी शासनाकडून मोठ्या प्रमाणावर वेळोवेळी निधी उपलब्ध होतो. मात्र, देवस्थान खेड तालुक्यात असूनही रस्ता तालुक्यातून नसल्याने रस्त्याला समांतर विकास हा आंबेगाव तालुक्यात होतो आहे. भक्त निवास, रस्ते विकास याबाबत मोठ्या सुविधा आंबेगाव तालुक्यात झालेल्या आहेत.
या मंजूर विकास आराखड्यात भोरगिरी येथील कोटेश्र्वर देवस्थान, भीमा नदीच्या तीरावरील पवित्र ठिकाण, तसेच भोरगडाचा विकास व्हावा, तसेच भोरगिरी- भीमाशंकर रस्ता होऊन या मार्गावरील गुप्त भीमाशंकर, भीमा नदीचे उगमस्थान, साक्षी विनायक या पवित्र ठिकाणांचा विकास व्हावा.नव्याने प्रस्तावीत राजगुरुनगर- वाडा- डेहणे- टोकावडे- कारकुडी येथून पुढे आंबेगाव तालुक्यातून भीमाशंकरला जाणारा मार्ग टोकावडे- कारकुडी- भोरगिरीमार्गे भीमाशंकर होण्याबाबत विचार व्हावा. भीमाशंकर देवस्थान समिती, देवस्थान नियोजनाबाबत होणाऱ्या बैठका खेड तालुक्यात घ्याव्यात.
भीमाशंकर देवस्थान आमच्या तालुक्यात असूनही विकास आमच्याकडे होत नाही. याबाबत शासनाचे लक्ष वेधण्यासाठी निवेदन दिले असून विकास होणे गरजेचे आहे, असे वनघरे यांनी सांगितले.