आईसमवेत विद्यार्थ्यांचा वृक्षसंवर्धनाचा संकल्प

चास, ता. १५ : कमानच्या बारापाटी (ता. खेड) येथील जिल्हा परिषद प्राथमिक शाळेत ‘गार्डन्स फॉर लाइफ उपक्रमाची सुरवात झाली. त्याअंतर्गत आयोजित ‘एक पेड माँ के नाम’ या उपक्रमाला विद्यार्थ्यांचा उत्तम प्रतिसाद मिळत असल्याची माहिती मुख्याध्यापक संजय नाईकरे यांनी दिली.
लाइफ इको क्लब’च्या माध्यमातून हा उपक्रम होत आहे. ‘एक पेड माँ के नाम’ उपक्रमांतर्गत शाळेतील सर्व विद्यार्थ्यांच्या हस्ते फणस बियांचे रोपण करण्यात आले. विद्यार्थ्यांनी आपल्या आईसमवेत यात सहभाग घेतला होता. दरम्यान, ‘घरोघरी गार्डन्स फॉर लाइफ उपक्रमाचीही सुरवात करण्यात आली. त्यासाठी प्रत्येक विद्यार्थ्याला पालकांनी घराजवळ छोटीशी जागा उपलब्ध करून देण्याचे आवाहन करण्यात आले होते. त्याला पालकांकडूनही सकारात्मक प्रतिसाद मिळाला. यावेळी शाळेकडून परसबागेचा उपक्रम हाती घेण्यात येणार असून ‘परिसर अभ्यास’ विषयाशी संबंधित विद्यार्थ्यांना प्रात्यक्षिक कृतीतून देण्याचाही प्रयत्न करण्यात येणार आहे. शाळेच्या बागेत देठ, भेंडी, भोपळा, काकडी, फणस बी, कारले, मिरची असे सहज उपलब्ध होणारे वाण लावण्यात येणार आहे. या वनस्पतींच्या लागवडीपासून वाढीपर्यंत लाइफ इको क्लब’चे सदस्य व विद्यार्थी त्यांची देखभाल करणार असल्याचे मुख्याध्यापक संजय नाईकरे यांनी सांगितले. शाळेच्या सहशिक्षिका व उपक्रम प्रमुख वैशाली नाईकरे यांनी उपक्रमाच्या आयोजनाबाबत माहिती दिली.