भिवेगाव धबधब्यात बुडून डॉक्टर, वाटाड्याचा मृत्यू

चास, ता. ११ : भिवेगाव (ता. खेड) येथील धबधब्यात बुडून दोघांचा मृत्यू झाला. त्यात एका पर्यटकाचा आणि त्याला वाचविण्याचा प्रयत्न करणाऱ्या स्थानिक वाटाड्याचा समावेश आहे.
याबाबतचे खेड पोलिसांनी माहिती दिली की, तळेगाव दाभाडे (ता. मावळ) येथील वैद्यकीय महाविद्यालयातून वैद्यकीय शिक्षण पूर्ण केलेले डॉ. मंदार खोडके, डॉ. मंजिरी कोल्हे, डॉ. प्रियांका खराडे व डॉ. सुबोध दिलीप करंडे (वय २७)हे फिरण्यासाठी खेड तालुक्याच्या पश्चिम पट्ट्यातील भिवेगाव येथे सोमवारी (ता. ११) गेले होते. त्यावेळी त्यांनी स्थानिक माहीतगार (वाटाड्या) म्हणून दिलीप वनघरे (वय २२) या तरुणाला बरोबर घेतले होते. दुपारी ते सर्व ट्रेक करत धबधब्याजवळ गेले. धबधब्याशेजारील ओढ्याच्या पात्रात सुबोध पोहण्यासाठी गेला. यावेळी दिलीप हा त्याचे फोटो व व्हिडिओ काढत होता. मात्र सुबोध याने हात वर केल्यावर त्याला वाचवायला दिलीप गेला. मात्र, दोघेही ओढ्याच्या पाण्यात बुडाले. यामध्ये दोघांचाही पाण्यात बुडून मृत्यू झाला.
याबाबतची माहिती मिळताच भिवेगावचे माजी सरपंच व बाजार समितीचे संचालक विठ्ठल वनघरे व पोलिस पाटील संतोष वनघरे यांनी तातडीने स्थानिकांच्या मदतीने घटनास्थळी धाव घेतली व दोघांचे मृतदेह बाहेर काढले. राजगुरुनगरच्या पोलिसांनी घटनास्थळी जाऊन पंचनामा केला.