बारापाटी येथे शेतकऱ्यांना मार्गदर्शन

चास, ता. १४ : कमान (ता. खेड) येथील बारापाटी येथे पशू संगोपन व दुग्ध व्यवसाय तसेच शेतकरी मार्गदर्शन शिबिराचा मोठ्या संख्येने शेतकऱ्यांनी लाभ घेतला.
सरनेस वाडिया फाउंडेशन यांच्या सीएसआर फंडातून आयोजित पशू संगोपन आणि दुग्ध व्यवसाय मार्गदर्शन शिबिरात कृषी विज्ञान केंद्र नारायणगावचे शास्त्रज्ञ डॉ. शेट्टी यांनी पिकावरील कीड व आळी या विषयावर व केंद्र सरकारच्या माध्यमातून दिल्या जाणाऱ्या, विविध योजनांविषयी मार्गदर्शन केले. डॉ. गाढवे यांनी कांदा पीक व्यवस्थापन या संबंधित माहिती दिली. डॉ. धनेश पडवळ यांनी शेतकऱ्यांना शेतीविषयक पूरक व्यवसाय म्हणून दुग्ध व्यवसाय कशाप्रकारे करावा, व त्यासंबंधी येणाऱ्या अडीअडचणींवर कशी मात करावी, त्यासोबत शासनाच्या विविध योजनांविषयी माहिती दिली. कृषी विज्ञान केंद्र नारायणगाव, पशुसंवर्धन विभाग, राजगुरुनगर सहकारी बँक तसेच कृषी विभागाच्या वतीने मार्गदर्शन करण्यात आले होते.