‘चासकमान’मधून रब्बीसाठी आवर्तन सुरू

चास, ता. १५ : खेड तालुक्यासह शिरूर तालुक्याचे नंदनवन करणाऱ्या चासकमान (ता. खेड) धरणातून रब्बी हंगामासाठी पहिले आवर्तन रविवारपासून (ता. १४) सोडण्यास सुरुवात झाली आहे. ८.५३ टीएमसी पाणीक्षमता असलेल्या चासकमान धरणात सद्यःस्थितीत ९७.१५ टक्के (८.३२ टीएमसी) पाणीसाठा शिल्लक असल्याची माहिती उपविभागीय अधिकारी एस. एस. शिंदे, तसेच सहाय्यक अभियंता श्रेणी १ शुभम सुसुंद्रे यांनी दिली.
चासकमान धरण परिसरात चालू वर्षी पावसाळा लांबल्याने डिसेंबर महिन्याचे पंधरा दिवस उलटूनही धरणातून पाण्याचे आवर्तन सोडण्यात आले नव्हते. सद्यःस्थितीत खेड तालुक्यासह शिरूर तालुक्यात रब्बी हंगामातील कांदा, तसेच उसाची लागवड सुरू आहे. लागवड झालेल्या रब्बी हंगामातील बटाटा, कांदा, मका, ज्वारी, गहू यांसह अन्य पिकांना पाण्याची गरज असल्याने शेतकऱ्यांकडून पाण्याची मागणी सुरू झाली होती. शेतकऱ्यांची गरज ओळखून चासकमान पाटबंधारे विभागाच्या वतीने वरिष्ठांच्या आदेशाने रविवारी धरणातून आवर्तन सोडण्यास सुरुवात झाली. सुमारे १०० क्यूसेकने धरणातून कालव्यात पाणी सोडण्यात येत आहे.
सद्यःस्थितीत धरणात ९७.१५ टक्के पाणीसाठा शिल्लक असून, मागील वर्षी हाच साठा ९६.२३ टक्के इतका शिल्लक होता. मागील वर्षाच्या तुलनेत तो अधिक आहे. सोडण्यात आलेले हे आवर्तन शेतकऱ्यांच्या मागणीनुसार सुरू असून, शेतकऱ्यांच्या मागणीवरूनच आवर्तनाचा कालावधी ठरणार आहे. त्याप्रमाणे पाण्याचे वितरण केले जाणार आहे. धरणातील सद्यःस्थितीत पाण्याची टक्केवारी चांगली असल्याने उन्हाळ्यातही आवर्तन सोडता येणे शक्य होणार असल्याने शेतकऱ्यांना उन्हाळी हंगामातील पिकांच्या बाबतीतही आशा आहे.
चासकमान प्रकल्पचे सहाय्यक अभियंता सुसुंद्रे यांनी सांगितले की, शेतकऱ्यांची पाण्याची मागणी लक्षात घेऊन वरिष्ठांच्या आदेशाने आवर्तन सोडण्यात आले. सुरुवातीला १०० क्यूसेकने कालव्यातून पाणी सोडण्यात आले असून, ते टप्याटप्याने वाढवून ५५० क्यूसेकपर्यंत वाढविण्यात येईल.