सर्पदंशाविषयी शेतकऱ्यांमध्ये जनजागृती करा

खोडद, ता. ६ : "सर्पदंश झाल्यानंतर घाबरून न जाता सर्पदंश झालेल्या व्यक्तीला मानसिक आधार द्या. त्याच्यावर त्वरित प्रथम उपचारांची गरज असते. सर्पदंश टाळण्यासाठी विद्यार्थ्यांनी पालकांमध्ये व शेतकऱ्यांमध्ये जनजागृती करावी," असे आवाहन सर्पदंश तज्ज्ञ डॉ.सदानंद राऊत यांनी केले.
हिवरेतर्फे नारायणगाव येथील ग्रामविकास मंडळ संचलित कुलस्वामी खंडेराय विद्यालयात विद्यार्थ्यांसाठी सर्पदंश व घ्यावयाची काळजी याविषयी सर्पदंश तज्ज्ञ डॉ. सदानंद राऊत यांची कार्यशाळा आयोजित करण्यात आली होती.
शेतमजूर, लहान मुले यांना सर्पदंश होण्याचे प्रमाण अधिक आहे. सर्पदंशाच्या बाबतीत माहिती व्हावी, जनजागृती व्हावी व त्यातून सर्पदंशाच्या घटनांचे प्रमाण कमी व्हावे. या हेतूने या कार्यशाळेचे आयोजन केले होते. या कार्यशाळेत विद्यार्थ्यांना सर्पदंशाबाबत माहितीपट दाखविण्यात आला. यावेळी डॉ. राऊत यांनी सर्पदंश कसा टाळावा? विषारी साप कोणते? बिनविषारी साप कोणते? सर्पदंश झाल्यानंतर प्राथमिक स्वरूपात काय काळजी घ्यावी? दंश केलेला साप विषारी आहे की बिनविषारी? हे कसे ओळखावे? याविषयी आपल्या विद्यार्थ्यांना सखोल मार्गदर्शन केले.

विद्यालयाचे मुख्याध्यापक तबाजी वागदरे यांनी प्रास्ताविक केले. ग्रामविकास मंडळाचे अध्यक्ष डॉ. प्रवीण शिंदे यांनी आभार मानले.

अशी घ्या काळजी
* जमिनीवर झोपू नका.कॉट किंवा बाजेवर झोपा.
* सर्पदंश झालेल्या रुग्णाला मोकळ्या हवेत घ्या.
* दंश झालेला भाग हृदयाच्या पातळीच्या खाली ठेवावा.
* सर्पदंशानंतर लक्षणे दिसण्याची वाट पाहू नका.
* दंश झालेल्या ठिकाणी कापू नका.
* दंश झालेल्या ठिकाणी बांधू नका.

सर्पदंश झालेल्या व्यक्तीचा जीव वाचवणे एवढेच ध्येय नाही तर सर्पदंश होऊच नये यासाठी सातत्याने प्रयत्न सुरू आहेत. यासाठी वेळोवेळी विविध कार्यशाळा, प्रशिक्षण शिबिरे आयोजित करून सर्पदंश कसे टाळता येतील. याबाबत विद्यार्थी व शेतकऱ्यांमध्ये जनजागृती करण्याचे काम सुरू आहे.
- डॉ.सदानंद राऊत, सर्पदंश तज्ज्ञ, नारायणगाव

00377