बिबट्याला पकडण्यासाठी मांजरवाडीत लावला पिंजरा

खोडद, ता. १७ : बिबट्याला पकडण्यासाठी मांजरवाडी (ता. जुन्नर) येथील स्वामी नगरमध्ये वनविभागाने पिंजरा लावला आहे.
या परिसरातील शेतकरी दिलीप थोरात यांच्या उसाच्या शेतात व धनगर वस्तीमध्ये मागील काही दिवसांपासून बिबट्याचा वावर असल्याने या ठिकाणी नागरिकांमध्ये भीती निर्माण झाली होती. बिबट्याच्या वावरामुळे शेतीच्या कामांवर परिणाम झाला आहे. शेतीची कामे वेळेत करता येत नाहीत. या परिसरातील शेतकऱ्यांनी येथे पिंजरा लावून बिबट्याला जेरबंद करण्याची मागणी केली होती.
जुन्नरचे उपवनसंरक्षक अमोल सातपुते, जुन्नर वनपरिक्षेत्र अधिकारी प्रदीप चव्हाण यांच्या मार्गदर्शनाखाली वनपाल अनिता होले, वनरक्षक ज्ञानेश्वर पवार यांनी येथे शनिवारी (ता. १७) पिंजरा लावला. पिंजरा लावण्यासाठी आपदा मित्र प्रशिक्षक सुशांत भुजबळ, पोलिस पाटील सचिन टाव्हारे, ऋषिकेश मुळे, आपदा मित्र तुषार टेके यांनी पिंजरा लावण्यासाठी मदत केली.