हिवरे तर्फे नारायणगावमध्ये माजी विद्यार्थी मेळावा

खोडद, ता. १९ : हिवरे तर्फे नारायणगाव (ता. जुन्नर) येथील कुलस्वामी खंडेराय विद्यालयामध्ये १९९९ ते २००० या शैक्षणिक वर्षात इयत्ता १० वी मध्ये शिक्षण पूर्ण केलेल्या माजी विद्यार्थ्यांचे स्नेहसंमेलन उत्साहात झाले.
शाळेच्या रौप्य महोत्सवाचे औचित्य साधून रविवारी (ता. १८) या कार्यक्रमाचे आयोजन करण्यात आले होते. स्नेहसंमेलनाच्या निमित्ताने ३० माजी विद्यार्थी आणि विद्यार्थिनी २५ वर्षांनी एकत्र आले होते. यावेळी या विद्यार्थ्यांना ज्ञानदानाचे कार्य करणाऱ्या सेवानिवृत्त शिक्षकांनाही निमंत्रित करण्यात आले होते. यामुळे हा कार्यक्रम अधिकच आनंददायी झाला.
कार्यक्रमाची सुरुवात सकाळी छत्रपती शिवाजी महाराजांच्या प्रतिमेला पुष्पहार अर्पण करून झाली. त्यानंतर सर्व माजी विद्यार्थी आणि शिक्षकांनी एकमेकांची ओळख करून घेत जुन्या आठवणींना उजाळा दिला. २५ वर्षांनंतर एकत्र आलेल्या विद्यार्थी आणि शिक्षकांनी शाळेतील दिवसांतील मजेदार आणि प्रेरणादायी किस्से सांगितले. कार्यक्रमाच्या अध्यक्षस्थानी कुलस्वामी खंडेराय विद्यालयाचे मुख्याध्यापक तबाजी वागदरे होते. यावेळी माजी विद्यार्थ्यांनी शाळेसाठी २५ हजार रुपयांची देणगी दिली.
कार्यक्रमाला प्राथमिक शाळेतील सेवानिवृत्त शिक्षक विठ्ठल खरमाळे, श्रीपत मुळे, शिवाजी आहेर, सयाजीराव चिखले, शीला शेळकंदे, सुरेश शेळकंदे, संगीता ढमाले, माध्यमिक शाळेतील मुख्याध्यापक बागदरे, शंकर वाघचौरे, अशोक चौधरी, भगवान काशीद उपस्थित होते. प्रास्ताविक वैभव शिंदे यांनी केले. सूत्रसंचालन अर्चना भोर यांनी तर आभार पवन हिंगे यांनी केले.
कार्यक्रम यशस्वी करण्यासाठी प्रदीप शिंदे, सचिन भोर, सोमनाथ कदम, प्रवीण शिंदे, शशिकांत भोर, राजेंद्र भोर, वर्षा भोर, पूनम भोर यांनी परिश्रम घेतले.