नारायणगडावर प्लॅस्टिक वापरण्यास बंदी

खोडद, ता. २४ : किल्ले नारायणगडावर पर्यटनासाठी जाताना प्लास्टिक कॅरिबॅग किंवा खाद्यपदार्थ प्लास्टिक मधून नेऊ नये, प्लॅस्टिक वापरण्यावर बंदी घालण्याचा निर्णय खोडद (ता. जुन्नर) ग्रामपंचायतीने घेतला आहे. यापुढे नारायणगडावर प्लॅस्टिक वापर करणाऱ्या पर्यटकांवर ग्रामपंचायतीकडून कायदेशीर कारवाई करण्यात येणार आहे.
बुधवारी (ता. २१) खोडद ग्रामपंचायतीमध्ये झालेल्या मासिक सभेत येथील किल्ले नारायणगडाला शासनाकडून पर्यटनाचा ‘क’ दर्जा प्राप्त झाला असून गडावर शनिवार, रविवारी तसेच इतर सुट्ट्यांच्या दिवशी पर्यटक मोठ्या प्रमाणात येत आहेत. पर्यटक गडावर येत असताना ते त्यांच्या सोबत प्लॅस्टिक पाण्याच्या बाटल्या, प्लॅस्टिक पिशवी, वेफर्स, कुरकुरे, प्लॅस्टिक पॅकिंग असलेले आदी अनेक प्रकारचे खाद्यपदार्थ घेऊन येत असतात. पदार्थ खाऊन झाल्यानंतर गडावर व येथील परिसरात टाकून देतात. त्यामुळे परिसरामध्ये अस्वच्छता निर्माण होऊन पर्यावरणाला व निसर्गाला हानी पोहचते.
अनेकवेळा पंचक्रोशीतील सेवा भावी संस्था स्वच्छता मोहीम राबून परिसर स्वच्छ ठेवण्याकरिता नेहमीच प्रयत्नशील असतात. मात्र प्लॅस्टिकसारख्या समस्या सोडविण्यासाठी आता पर्यटकांच्या इच्छाशक्तीची गरज आहे.
किल्ले नारायणगडावर तसेच परिसरात प्लॅस्टिक पिशव्या इतर प्लॅस्टिक वस्तू टाकणाऱ्या पर्यटकांवर योग्य ती कारवाई केली जाईल. पुढील काळात नारायणगड परिसर व नारायणगडावर जाणाऱ्या येणाऱ्यांसाठी प्लॅस्टिक बंदी ठराव मासिक सभेत घेण्यात आला आहे. सरपंच मनीषा गुळवे, उपसरपंच नवनाथ पोखरकर, ग्रामपंचायत सदस्य निर्मला थोरात, योगेश शिंदे, रवींद्र मुळे, गणपत वाळुंज, शुभांगी काळे, सविता गायकवाड, ग्रामपंचायत अधिकारी, सी. जी. मुठे यावेळी उपस्थित होते.