‘विमान वाहतुकीमुळे केळी निर्यातीस वाव’

खोडद, ता.७ : केळी निर्यातीसाठी विमान वाहतूक सेवा आपल्याजवळ असल्यामुळे निर्यातीला खूप वाव आहे. घडाला नियंत्रित फण्या ठेवल्यामुळे निर्यातीचा दर्जाचाचे उत्पादन मिळते. एकरी ३५ टनाचे उत्पादन मिळते.या उत्पादनातून शेतकऱ्याला सहा लाखाचा नफा मिळतो तर एकरी खर्च १ लाख ८० हजार रुपये येतो. निर्यातक्षम केळीसाठी ऑगस्ट ते डिसेंबरपर्यंत लागवड करावी, असे आवाहन जैन कंपनीचे ऍग्रोनॉमिस्ट तुषार जाधव यांनी केले.

मांजरवाडी (ता.जुन्नर) येथे कॅटव्हिला फार्मर प्रोडूसर कंपनीच्यावतीने केळी उत्पादक शेतकरी अनिल चक्कर पाटील यांच्या केळी बागेवर शिवार फेरीचे आयोजन केले होते. या शिवारफेरीसाठी केळी उत्पादक शेतकरी मोठ्या संख्येने उपस्थित होते. यावेळी जाधव यांनी केळी लागवडीपासून ते केळी काढणीपर्यंत कसे नियोजन केले पाहिजे यावर सविस्तर मार्गदर्शन केले.

शिवार फेरीसाठी जुन्नर तालुका कृषी उत्पन्न बाजार समितीचे संचालक माऊली खंडागळे, कृषी विज्ञान केंद्र नारायणगावचे शास्त्रज्ञ भरत टेमकर, सुयोग खोसे, ज्ञानेश्वर ग्रेप सोसायटीचे सचिव शशिकांत थोरात, मॅग्नेट प्रकल्पाचे ज्ञानेश थोरात, डेक्कन व्हॅलीच्या संचालिका नीलम बेल्हेकर, केळी उत्पादक उपस्थित होते. कॅटव्हिला कंपनीचे संचालक दीपेश मुळे यांनी आभार मानले.

01501