खोडदकरांकडून आंदोलकांना मायेचा घास

खोडद, ता. १ : मराठा समाजाच्या आरक्षणासाठी मुंबईत सुरू असलेल्या आंदोलनात सहभागी असलेल्या आंदोलकांना खोडद (ता. जुन्नर) येथील ग्रामस्थ, तरुणांनी मायेचा घास दिला. गावातून चपात्या, पुऱ्या, भाकरी, चटणी, ठेचा, बिस्कीट, पाणी पाठविण्यात आले आहेत. सोमवारी (ता. १) हे सर्व पदार्थ येथील जगदंबा मातेच्या मंदिराजवळ जमा केले होते.
मुंबईत २९ ऑगस्टपासून मनोज जरांगे पाटील यांच्या नेतृत्वाखाली मराठा समाजाला आरक्षण मिळण्यासाठी आंदोलन सुरू आहे. जरांगे पाटील यांनी या आंदोलनात आमरण उपोषण सुरू केले आहे. जरांगे पाटील यांना पाठिंबा देण्यासाठी महाराष्ट्रातून मोठ्या संख्येने मराठा बांधव आंदोलनात सहभागी झाले आहेत. या आंदोलकांची जेवणाची मोठी गैरसोय झाली होती. मराठा आंदोलकांची जेवणाची झालेली गैरसोय लक्षात घेऊन येथील ग्रामस्थांनी या आंदोलकांसाठी जेवण पाठविण्याचा निर्णय घेतला. तरुणांनी गावात केलेल्या आवाहनाला सकारात्मक प्रतिसाद देत ग्रामस्थांनी विविध पदार्थ मोठ्या प्रमाणात जमा केले. सुमारे पाच हजार आंदोलकांना पुरेल इतके अन्न ग्रामस्थांनी जमा केले आहे. या साहित्यात चपात्या, बाजरीच्या भाकरी, शेंगदाण्याची चटणी ४० किलो, भेळ १०० किलो, १०० किलो गव्हाच्या पुऱ्या, पाण्याच्या बॉटलचे बॉक्स, बिस्किटांचे बॉक्स आदी खाद्यपदार्थ ग्रामस्थांनी उत्स्फूर्तपणे जमा केले आहे. जमा झालेले सर्व खाद्यपदार्थ टेम्पोतून मुंबईला पाठविण्यात आले आहे.

01559