पारगाव तर्फे आळेत नरभक्षक बिबट्या जेरबंद!
खोडद, ता. १६ : पारगाव तर्फे आळे (ता. जुन्नर) येथील रामवाडीत वनविभागाने लावलेल्या पिंजऱ्यात मंगळवारी (ता.१६) रात्रीच्या सुमारास बिबट्या जेरबंद झाला. हा बिबट नर जातीचा असून पाच ते सहा वर्षे वयाचा आहे. या बिबट्याला वनविभागाच्या कर्मचाऱ्यांनी माणिकडोह येथील बिबट निवारा केंद्रात हलविले आहे. रोहित बाबूराव कापरे या ८ वर्षांच्या मुलावर ज्या ठिकाणी हल्ला करण्यात आला होता, त्याच ठिकाणी लावलेल्या पिंजऱ्यात हा बिबट्या अडकला असल्याने हा तोच नरभक्षक बिबट्या असावा असा अंदाज व्यक्त केला जात आहे.
रामवाडी येथे शेतकरी श्रीराम भिकाजी भोर यांच्या शेतात बिबट्याने लहान मुलावर हल्ला करून त्याला ठार केल्याची घटना सोमवारी (ता. १५) सकाळी साडेअकराच्या सुमारास घडली होती. या नरभक्षक बिबट्याला तत्काळ जेरबंद करण्याचे जुन्नर वनविभागासमोर मोठे आव्हान होते. ही घटना घडल्यानंतर जुन्नर वनविभागाने या परिसरात तत्काळ १५ पिंजरे आणि १० ट्रॅप कॅमेरे लावले होते. पिंजऱ्यांमध्ये कोंबड्या आणि बकऱ्या भक्ष्य म्हणून ठेवण्यात आले होते. वनविभागाचे अनेक कर्मचारी येथे सातत्याने लक्ष ठेवून होते. सोमवारी व मंगळवारी दिवसभर बिबट्या पिंजऱ्याकडे फिरकला नाही. यावेळी या शेताच्या परिसरात लांबूनच फिरताना बिबट्याला अनेकांनी पाहिले होते. या परिसरात एका पेक्षा अधिक बिबटे असावेत, असा अंदाज व्यक्त केला जात आहे.अखेर मंगळवारी रात्री ८ वाजता नर बिबट्या या पिंजऱ्यात जेरबंद झाला आणि या परिसरातील नागरिकांनी सुटकेचा निःश्वास सोडला.
जुन्नरचे उपवनसंरक्षक प्रशांत खाडे यांच्या मार्गदर्शनाखाली जुन्नरच्या साहाय्यक वनसंरक्षक स्मिता राजहंस, वनपरिक्षेत्र अधिकारी प्रदीप चव्हाण, चैतन्य कांबळे, वनपाल नीलम ढोबळे, गणेश बागडे, वनरक्षक विशाल गुंड, स्वप्नील केदारी, विश्वराज सोळुंके, महेश जाधव, कैलास भालेराव, ज्ञानेश्वर साळुंखे व सर्व टीमने पिंजरे लावण्यासाठी बिबट्याची वाट पाहत परिश्रम घेतले होते.बिबट्या जेरबंद झाल्यानंतर सर्व अधिकाऱ्यांनी व कर्मचाऱ्यांनी दोन दिवस घेतलेल्या परिश्रमाचे चीज झाल्याचे समाधान व्यक्त केले.
तपासणी अहवालानंतर समजेल
बिबट्याने हल्ला केलेल्या ठिकाणी लावलेल्या पिंजऱ्यात बिबट्या जेरबंद झाला असल्याने हा तोच नरभक्षक बिबट्या असावा असा प्राथमिक अंदाज व्यक्त केला जात आहे.बिबट्याच्या हल्ल्यात मृत्यू झालेल्या रोहितचे स्वॅप व जेरबंद झालेल्या बिबट्याचे स्वॅप घेऊन हे दोन्हीही स्वॅप नागपूर येथील फॉरेन्सिक लॅबमध्ये तपासणीसाठी पाठवले जाणार आहेत. तपासणी अहवाल दोन दिवसांत येणार असून तपासणी अहवाल आल्यानंतर जेरबंद झालेला बिबट्या नरभक्षक आहे की नाही ते स्पष्ट होईल.
1815
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.