दौंडमध्ये साठे उद्यानाच्या दुरुस्तीची मागणी

दौंड, ता. १८ : दौंड शहरातील लोकशाहीर अण्णा भाऊ साठे उद्यानाची तातडीने दुरूस्ती करण्याची मागणी करण्यात आली आहे. दुरूस्ती न केल्यास आंदोलनाचा इशारा देण्यात आला आहे.
दौंड नगरपालिकेचे मुख्याधिकारी यांच्याकडे एका निवदेनाद्वारे महाराष्ट्र राज्य कास्ट्राईब शिक्षक महासंघाचे अध्यक्ष गौतम कांबळे यांनी ही मागणी केली आहे. दौंड शहरातील एकमेव अशा अण्णा भाऊ साठे उद्यानाची दुरवस्था झालेली असून त्यामध्ये नियमित देखभाल नसल्याने घाणीचे साम्राज्य आहे. शहरातील बालकांना खेळण्यासाठी कुठेही उद्यान उपलब्ध नाही तसेच ज्येष्ठ नागरिकांसाठी या उद्यानात विरंगुळा केंद्र नसल्याने गैरसोय होत आहे. नगरपालिकेने तातडीने दुरूस्ती न केल्यास १ ऑगस्ट रोजी या उद्यानात शिक्षक बांधवांसह निषेध सभा घेऊन रास्ता रोको आंदोलन करण्याचा इशारा गौतम कांबळे यांनी दिला आहे.
-----