यवत येथे लोकशाही दिनाचे आयोजन

दौंड, ता. १२ : यवत (ता. दौंड) येथे सोमवारी (ता. १७) लोकशाही दिनाचे आयोजन करण्यात आल्याची माहिती दौंडचे तहसीलदार अरुण शेलार यांनी दिली. लोकशाही दिन व जागतिक ग्राहक हक्क दिनानिमित्त येथील पालखी तळ मैदानावर तालुक्यातील सर्व शासकीय विभागाचे अधिकारी व प्रतिनिधी उपस्थिती राहणार आहेत.
ग्रामस्थांच्या शासनाच्या विविध विभागांसंबंधी असलेल्या अडीअडचणी यावेळी सोडविल्या जाणार आहेत. तसेच डिजिटल पब्लिक इन्फ्रास्ट्रक्चर फॉर ॲग्रिकल्चर अंतर्गत अ‍ॅग्रीस्टॅक शेतकरी आयडी तयार करून देणे, शिधापत्रिका विषयक ई- केवायसी करणे, विशेष अर्थसाह्य योजनांबाबत ई- केवायसी करणे, आयुष्यमान भारत योजनेकरिता नोंदणी करणे आदी सुविधा देखील ग्रामस्थांकरिता उपलब्ध करून देण्यात आल्या आहेत. नागरिकांनी या लोकशाही दिनात सहभागी होऊन आपल्या अडचणींचे निराकरण करून घ्यावे, असे आवाहन शेलार यांनी केले आहे.