दौंडच्या यात्रेनिमित्त मंगळवारपासून कार्यक्रम

दौंड, ता. १८ : दौंड शहराचे आराध्य ग्रामदैवत श्री काळभैरवनाथ यांच्या यात्रा उत्सवास मंगळवारपासून (ता. २२) सुरू होत आहे, अशी माहिती दौंडचे पाटील व माजी नगराध्यक्ष इंद्रजित जगदाळे यांनी माहिती दिली.
दौंड शहरातील श्री काळभैरवनाथ- जोगेश्वरी माता मंदिर परिसरात सोमवारी रात्री साडेअकरा वाजता मंदारबुवा गोखले यांचे श्री काळभैरवनाथ जन्माचे नारदीय कीर्तन होणार आहे. त्यानंतर मध्यरात्री १ वाजून ५८ मिनिटांनी देवजन्माचा सोहळा व जगदाळे पाटील कुटुंबीयांच्या हस्ते मानाची पूजा होईल. सकाळी जगदाळे पाटील कुटुंबीयांच्या हस्ते मूर्तीस अभिषेक करण्यात येईल. मंगळवारी रात्री आठ वाजता छबिना व पालखीच्या सवाद्य मिरवणुकीनंतर बाजारतळ येथे रात्री साडेदहा वाजता आतषबाजी केली जाणार आहे. त्यानंतर रात्री बारा वाजल्यानंतर पाटील चौकात दत्ता महाडीक पुणेकर यांच्या फडातील कलावंत लोकनाट्य तमाशा सादर करणार आहेत. बुधवारी सकाळी नऊ ते साडेअकरा वाजेपर्यंत हजेऱ्या होणार आहेत. सायंकाळी पाच वाजता गाववेशीसमोरील श्री चैतन्य मारूती मंदिर प्रांगणात इनामी कुस्त्यांचा फड आयोजित करण्यात आला आहे. तर रात्री साडेनऊ वाजता पाटील चौकातील संगीत बारीत हिंदवी पाटील यांचे कला पथक हिऱ्याची हिरकणी’ सादर करणार आहे, अशी माहिती अॅड. निखिल गुरव यांनी दिली