दौंड न्यायालयात आत्मदहनाचा प्रयत्न

दौंड, ता. १७ : दौंड न्यायालयाच्या आवारात एका व्यक्तीने आत्मदहनाचा प्रयत्न केला. कौटुंबिक समस्येची पोलिस दखल घेत नसल्याच्या वैफल्यातून आत्मदहनाचा प्रयत्न केल्याची प्राथमिक माहिती आहे.
दौंड पोलिस ठाण्यात मोहन डी. वीरकर ( वय ४५, रा. लोखंडे वस्ती, दौंड) हे त्यांची कौटुंबिक समस्या घेऊन गेले होते. परंतु त्यांची समस्या कुटुंबीयांनी बसून सामोपचाराने सोडविण्याचा सल्ला देत पोलिसांनी कारवाई केली नाही, असा मोहन वीरकर यांचा दावा आहे. पोलिसांनी कारवाई न केल्याने वैफल्यग्रस्त होऊन वीरकर हे आज ( ता. १७) सकाळी साडेअकराच्या दरम्यान दौंड न्यायालयाच्या आवारात त्यांच्या मुलांसह गेले. पोलिस दखल घेत नाही म्हणून त्यांनी तेथे आरडाओरडा करीत स्वतःच्या अंगावर ज्वलनशील द्रव्य ओतून आत्मदहनाचा प्रयत्न केला. प्रसंगावधान राखत दौंड वकील संघाचे अध्यक्ष अॅड. प्रशांत गिरमकर व उपस्थितांनी त्यांना रोखल्याने पुढील अनर्थ टळला.
दौंड पोलिसांना या बाबत माहिती मिळाल्यानंतर तातडीने एक पोलिस पथक न्यायालयाच्या आवारात दाखल झाले. त्यांनी मोहन वीरकर यांना ताब्यात घेतले. दौंड पोलिस ठाण्याचे अंमलदार किरण ढूके यांना या बाबत विचारले असता, त्यांनी आपण आज पदभार घेतल्यापासून कोणी कौटुंबिक समस्येसंबंधी तक्रार घेऊन आलेले नाहीत, अशी माहिती दिली.
दरम्यान, दौंड उप जिल्हा रूग्णालयात मोहन वीरकर यांची वैद्यकीय तपासणी करण्यात आल्यानंतर त्यांच्यावर प्रतिबंधात्मक कारवाई करण्यात आल्याची माहिती दौंड पोलिस ठाण्याचे दफ्तरती संजय कोठावळे यांनी दिली.
----