नगररचना सहायकवर लाचप्रकरणी गुन्हा

दौंड, ता. २४ : दौंड शहरातील एका नियोजित पेट्रोल पंपाच्या बांधकाम आराखडा व बांधकाम परवान्यासाठी साडेतीन लाख रुपयांची लाच मागितल्याप्रकरणी दौंड नगरपालिकेतील नगररचना सहायकाविरूध्द गुन्हा दाखल केला आहे. तत्कालीन मुख्याधिकारी व स्वतः करिता विजयकुमार हावशेटे याने लाच मागितली होती.
दौंड नगरपालिकेतील नगररचना सहायक विजयकुमार हावशेटे (वय ३१, हल्ली रा. व्यंकटेश पार्क, देवकीनगर, दौंड) याच्याविरूध्द गुन्हा दाखल केला आहे. तक्रारदारास नगरपालिका हद्दीत पेट्रोल पंप सुरू करावयाचा असल्याने त्यांनी दौंड नगरपालिकेकडे रीतसर अर्ज केला होता. नगररचना सहायक विजयकुमार हावशेटे याने बांधकाम परवानगी देण्याकरिता स्वतः साठी आणि तत्कालीन मुख्याधिकारी विजयकुमार कावळे यांच्याकरिता जानेवारी २०२५ मध्ये एकूण चार लाख रुपयांची मागणी केली होती. या बाबत तक्रारदाराने पुण येथील लाचलुचपत प्रतिबंधक विभागाकडे संपर्क साधून तक्रार केली होती.
त्यानंतर विजयकुमार हावशेटे याने तक्रारदाराशी तडजोड करून साडेतीन लाख रुपयांच्या मोबदल्यात आवश्यक परवानग्या देण्याचे मान्य केले. दरम्यान लाचेची मागणी झाल्याचे पडताळणी मध्ये निष्पन्न झाल्यानंतर बुधवारी ( ता. २३) रात्री दौंड पोलिस ठाण्यात विजयकुमार हावशेटे याच्याविरूध्द भ्रष्टाचार प्रतिबंधक अधिनियमातील विविध कलमान्वये गुन्हा दाखल करण्यात आला. लाचलुचपत प्रतिबंधक विभागाचे निरीक्षक रूपेश जाधव या प्रकरणी पुढील तपास करीत आहेत.