‘गणेशोत्सव पर्यावरणपूरक साजरा करा’

दौंड, ता. २६ : राज्य शासनाने गणेशोत्सवाला ‘राज्य महोत्सवाचा’ दर्जा दिलेला असून, दौंड तालुक्यात गणेशोत्सव पर्यावरणपूरक पद्धतीने आणि डीजेमुक्त साजरा करण्याचे आवाहन प्रशासनाच्या वतीने करण्यात आले आहे.
दौंड शहरातील मध्यवर्ती प्रशासकीय इमारत येथे मंगळवारी (ता. २६) पार पडलेल्या बैठकीत हे आवाहन करण्यात आले. प्रांताधिकारी रेवणनाथ लबडे, तहसीलदार अरुण शेलार, पोलिस उपअधीक्षक बापूराव दडस, विविध गावांचे पोलिस पाटील आदी यावेळी उपस्थित होते. प्रांताधिकाऱ्यांनी बैठकीत गणेशोत्सव हा शांततेत व उत्साहपूर्ण वातावरणात साजरा करण्याकरिता दौंड तालुक्यातील सर्व संबंधित विभागांना आवश्यक उपाययोजना करण्याविषयी सूचना दिली. गणेशोत्सव व अन्य सणांच्या काळात कोणताही अनुचित प्रकार घडू नये, याकरिता गावनिहाय कर्मचाऱ्यांची नियुक्ती करण्याची सूचना दिली. उत्कृष्ट काम करणाऱ्या तीन गणेशोत्सव मंडळांना पुरस्कार देण्याची घोषणा बैठकीत केली.