‘उद्यान एक्सप्रेस’मध्ये सैनिकाचा मोबाईल चोरी

दौंड, ता. ३ : बेंगळुरू- मुंबई उद्यान एक्सप्रेसमधून प्रवास करणाऱ्या एका नौदल सैनिकाचा मोबाईल संच चोरीस गेला आहे. वातानुकूलित डब्यात ही चोरी झाली आहे.
नौदलात सेवा करणारे विकास जे. कुमार (वय ३१, रा. मालाड, मुंबई) हे शनिवारी (ता. ३०) ‘उद्यान एक्सप्रेस’ने बेंगळुरू ते मुंबई, असा प्रवास करीत होते. प्रवासादरम्यान दुपारी भिगवण (ता. इंदापूर) रेल्वे स्थानक आल्यावर त्यांना त्यांची बॅग चोरीस गेल्याचे लक्षात आले. बॅगेतील एक मोबाईल संच, रोख रक्कम, नौदलाचे कॅन्टीन कार्ड, क्रेडिट कार्ड, एटीएम कार्ड, असा एकूण सोळा हजार रुपयांचा ऐवज चोरीस गेले आहे, असे असल्याचे फिर्यादीत नमूद केले आहे. याबाबत विकास कुमार यांनी धावत्या एक्सप्रेसमधील रेल्वे सुरक्षा दलाच्या अंमलदाराकडे लेखी तक्रार केली होती. त्यानंतर सदर चोरीचा गुन्हा तपासाकरिता दौंड लोहमार्ग पोलिस ठाण्यात वर्ग केला. दौंड लोहमार्ग पोलिस ठाण्यात या प्रकरणी ३१ ऑगस्ट रोजी अज्ञात चोरट्याविरुद्ध चोरीचा गुन्हा दाखल केला आहे.