नवीन गार येथे तिघांना मारहाण

दौंड, ता. १६ : नवीन गार (ता. दौंड) येथे तीन जणांना बेदम मारहाण केल्याप्रकरणी तिघांविरुद्ध गुन्हा दाखल करण्यात आला आहे. दौंड पोलिसांनी मंगळवारी ( ता. १६) या बाबत माहिती दिली. शरद काळूराम पासलकर (वय ५०, मूळ रा. पानशेत, ता. राजगड , हल्ली रा. नवीन गार) यांच्यासह त्यांचे वडील व भावाला सोमवारी (ता. १६) मारहाण करण्यात आली. मोटारीतून आलेल्या संतोष बाळू कडू , रामचंद्र नथू कडू ( दोघे रा. बेटवाडी, ता. दौंड) व एक अनोळखी तरुणाने शरद पासलकर यांना रात्री नऊच्या सुमारास लोखंडी गज व काठीने मारहाण केली. शरद पासलकर यांचे वडील व भाऊ मारहाण थांबविण्यास मध्ये पडले असता त्यांना देखील बेदम मारहाण करण्यात आली, असे शरद पासलकर यांनी दिलेल्या फिर्यादीत नमूद करण्यात आले आहे. मारहाण करण्यामागील नेमके कारण स्पष्ट झाले नसून दौंड पोलिस पुढील तपास करीत आहेत.