आलेगाव येथे वह्या वाटप

देऊळगाव राजे, ता. १८ : आलेगाव कदमवस्ती (ता. दौंड) येथील विठ्ठलराव कदम व छायाताई दिलीप कदम यांच्या स्मरणार्थ कदम कुटुंबीयांच्या वतीने जिल्हा परिषद प्राथमिक शाळा व आलेश्वर माध्यमिक विद्यालयातील गरजू विद्यार्थांना वह्यांचे वाटप करण्यात आले. तसेच दहावीमध्ये यश मिळवणाऱ्या गुणवंत विद्यार्थ्यांचा गौरव करण्यात आला. वह्या वाटपाचे हे २८ वर्ष आहे.
कार्यक्रमाला जिल्हा परिषदेचे माजी सदस्य वीरधवल जगदाळे, सिद्धेश्वर शिक्षण संस्थेचे सचिव हरिश्‍चंद्र ठोंबरे, संचालक चंद्रकांत दरेकर, सरपंच नवनाथ कदम, माजी सरपंच हेमंत कदम, तालुका खरेदी विक्री संघाचे संचालक अशोक कदम, भाऊसाहेब काळे, हंबीर धुमाळ, सुभाष कदम, मुख्याध्यापक शिवाजी काळे, महेश केजळे आदी उपस्थित होते. मान्यवरांच्या हस्ते वह्यावाटप करण्यात येऊन दहावीमध्ये प्रावीण्य मिळवलेल्या विद्यार्थ्यांचा रोख रक्कम देऊन सत्कार केला.
गावातील ४० गरजू रुग्णांना साखर तपासणी व रक्तदाब मापक किटचे वाटपही कदम कुटुंबीयांच्या वतीने करण्यात आले. सूत्रसंचालन सचिन कदम यांनी केले.